O‘zbekiston elchisi Xurshid Mirzohidov Qirg‘iziston prezidenti Sadir Japarovga ishonch yorliqlarini topshirdi, deb xabar bermoqda “Dunyo” AA.
Marosim Ala-Archa davlat rezidensiyasida bo‘lib o‘tgan. Tadbirdan so‘ng bo‘lib o‘tgan suhbat chog‘ida Qirg‘iziston rahbari muhim kelishuvlarga erishish va ikkala tomonning manfaatlariga javob beruvchi bir qator kelishuvlarga imzo chekish bilan yakunlangan O‘zbekistonga mart oyidagi davlat tashrifi va Prezident Shavkat Mirziyoyev bilan muzokaralari muvaffaqiyatli yakunlanganini alohida qayd etgan.
Ta’kidlanishicha, Qirg‘iziston va O‘zbekiston o‘rtasidagi munosabatlarning hozirgi yuqori o‘suvchanligi nafaqat ikki mamlakat qardosh xalqlarining yanada farovonligiga, balki butun Markaziy Osiyo mintaqasi xavfsizligi va barqarorligini mustahkamlashga xizmat qiladi.
Har ikki tomon Xitoy–Qirg‘iziston–O‘zbekiston temiryo‘li qurilishi loyihasini amalga oshirish, shuningdek, iqtisodiy foydali yo‘nalishlar bo‘ylab multimodal tashuvlarga katta ahamiyat bermoqda.
Bundan tashqari, Qirg‘iziston prezidenti koronavirus pandemiyasi vaqtida gumanitar va texnikaviy yordam ko‘rsatgani uchun qardosh O‘zbekiston rahbariyati va xalqiga minnatdorlik bildirgan.
Ma’lumot uchun, Xurshid Mirzohidov Qirg‘iziston poytaxti Bishkekka 2020-yilning 31-mayida borgan va 15-iyundayoq Qirg‘iziston TIV rahbariga ishonch yorlig‘i nusxasini topshirgan.
Xurshid Mirzohidov bunga qadar O‘zbekiston axborot texnologiyalari va kommunikatsiyalarini rivojlantirish vaziri, Milliy teleradiokompaniya raisi, Transport vazirligi huzuridagi Avtomobil yo‘llari qo‘mitasi raisining o‘rinbosari lavozimlarida ishlagan.
Undan oldin O‘zbekistonning Qirg‘izistondagi elchisi lavozimida Komil Rashidov faoliyat yuritgan.
Izoh (0)