Andijon viloyatida 18 yoshli kelin zo‘rlangani, holat yuzasidan jinoyat ishi qo‘zg‘atilib, Andijon viloyati IIB tomonidan dastlabki tergov harakatlari olib borilayotgani haqida xabar berilgan edi. Ushbu jinoyat ishini ichki ishlar vaziri shaxsan nazoratga oldi. Bu haqda vazirlik matbuot xizmati xabar berdi.
Xabarga ko‘ra, ushbu jinoyatni fosh etish jarayoni ichki ishlar vazirining shaxsan nazoratida bo‘lib, holat to‘liq o‘rganilmoqda. Tergovning yakuni bo‘yicha har bir ishtirokchining harakatlariga huquqiy baho beriladi hamda aybdorlar uchun jazo muqarrarligi ta’minlanishi kafolatlanadi. Bu haqda jamoatchilikka o‘z vaqtida va batafsil e’lon qilinadi.
Holat yuzasidan Jinoyat kodeksining 118-moddasi 1-qismi (nomusga tegish, ya’ni zo‘rlik ishlatib, qo‘rqitib yoki jabrlanuvchining ojizligidan foydalanib, jinsiy aloqa qilish) bilan jinoyat ishi qo‘zg‘atilgan. Tergov harakatlari Andijon viloyati IIB tomonidan amalga oshirilmoqda. Ishga Ichki ishlar vazirligining alohida mutaxassislari jalb etilgan.
Hozirda voqea joyidan olingan ashyolar, biologik izlar, jabrlanuvchi va gumonlanuvchilarga tegishli kiyimlar dalil tariqasida olinib, sud-tibbiy ekspertiza, sudga oid biologik ekspertiza va sudga oid fizika-texnikaviy ekspertizalar tayinlangan.
Shuningdek, jabrlanuvchi ayolning ko‘rsatmasiga ko‘ra, unga zo‘rlik ishlatgan hamda jinsiy aloqada bo‘lganligi vaj qilinayotgan olti nafar gumonlanuvchi fuqarolarning ko‘rgazmalari, voqeaning xronologik tartibi hamda mavjud guvohlarning bayonotlari to‘liq o‘rganilmoqda. Voqea yuzasidan gumonlanuvchilar va guvohlarning ko‘rsatmalari, dastlabki sud-tibbiy ekspertizasining natijalari hamda jabrlanuvchining ko‘rsatmalari o‘rtasida jiddiy tafovutlar borligi sababli qo‘shimcha tergov va tezkor harakatlari amalga oshirilmoqda.
Eslatib o‘tamiz, ijtimoiy tarmoqlarda tarqalgan xabarda Andijon viloyatida 5 oylik kelinchak dala shiyponida idishlarni yuvish uchun chiqqanida spirtli ichimlik ta’sirida bo‘lgan besh kishi tomonidan qo‘l-oyog‘ini bog‘lab, zo‘rlangani aytilgan. Bosh prokuratura matbuot xizmati holat bo‘yicha qo‘shimcha ma’lumotlarni taqdim etib, ayolni zo‘rlaganlikda besh emas, balki olti kishi gumon qilinayotgani, ularning barchasi Andijon tumanida yashashini ma’lum qilgandi.
Avvalroq ushbu jinoyat ishi Senatning Xotin-qizlar va gender tenglik masalalari qo‘mitasi tomonidan nazoratga olingani haqida xabar berilgan edi.
Izoh (0)