Ўзбекистон элчиси Хуршид Мирзоҳидов Қирғизистон президенти Садир Жапаровга ишонч ёрлиқларини топширди, деб хабар бермоқда «Дунё» АА.
Маросим Ала-Арча давлат резиденциясида бўлиб ўтган. Тадбирдан сўнг бўлиб ўтган суҳбат чоғида Қирғизистон раҳбари муҳим келишувларга эришиш ва иккала томоннинг манфаатларига жавоб берувчи бир қатор келишувларга имзо чекиш билан якунланган Ўзбекистонга март ойидаги давлат ташрифи ва Президент Шавкат Мирзиёев билан музокаралари муваффақиятли якунланганини алоҳида қайд этган.
Таъкидланишича, Қирғизистон ва Ўзбекистон ўртасидаги муносабатларнинг ҳозирги юқори ўсувчанлиги нафақат икки мамлакат қардош халқларининг янада фаровонлигига, балки бутун Марказий Осиё минтақаси хавфсизлиги ва барқарорлигини мустаҳкамлашга хизмат қилади.
Ҳар икки томон Хитой–Қирғизистон–Ўзбекистон темир йўли қурилиши лойиҳасини амалга ошириш, шунингдек, иқтисодий фойдали йўналишлар бўйлаб мултимодал ташувларга катта аҳамият бермоқда.
Бундан ташқари, Қирғизистон президенти коронавирус пандемияси вақтида гуманитар ва техникавий ёрдам кўрсатгани учун қардош Ўзбекистон раҳбарияти ва халқига миннатдорлик билдирган.
Маълумот учун, Хуршид Мирзоҳидов Қирғизистон пойтахти Бишкекка 2020 йилнинг 31 майида борган ва 15 июндаёқ Қирғизистон ТИВ раҳбарига ишонч ёрлиғи нусхасини топширган.
Хуршид Мирзоҳидов бунга қадар Ўзбекистон ахборот технологиялари ва коммуникацияларини ривожлантириш вазири, Миллий телерадиокомпания раиси, Транспорт вазирлиги ҳузуридаги Автомобиль йўллари қўмитаси раисининг ўринбосари лавозимларида ишлаган.
Ундан олдин Ўзбекистоннинг Қирғизистондаги элчиси лавозимида Комил Рашидов фаолият юритган.
Изоҳ (0)