Rossiya prezidenti Vladimir Putin Tojikiston bilan birgalikda mintaqaviy havo hujumiga qarshi mudofaaning yagona tizimini yaratishni ma’qulladi. Tegishli buyruq huquqiy ma’lumotlar rasmiy portalida e’lon qilindi, deb yozadi “RBK”.
“Rossiya Federatsiyasi va Tojikiston Respublikasi hamkorlikda mintaqaviy havo hujumiga qarshi mudofaa tizimini yaratish bo‘yicha ikki davlat o‘rtasida bitim imzolash to‘g‘risida Rossiya hukumati taklif qabul qilsin”, — deyiladi hujjatda.
Davlat rahbari Mudofaa vazirligi va Tashqi ishlar vazirligiga Tojikiston bilan shartnoma tuzish bo‘yicha muzokaralarni boshlashni buyurdi.
Hukumat kelishuv loyihasini 12-may kuni e’lon qilgan edi. Uning matni Mudofaa vazirligi tomonidan tayyorlangan. Kelishuv ikkala mamlakatning mintaqadagi havo hujumiga qarshi mudofaa kuchlarining birgalikdagi harakatlarini muvofiqlashtirishni nazarda tutadi. Umumiy yetakchilikni Rossiyaning Markaziy harbiy okrugi kuchlari qo‘mondoni amalga oshiradi.
Kelishuvni tomonlardan birining qaroriga ko‘ra bekor qilish huquqi bilan noma’lum muddatga tuzish taklif etiladi.
Putin 8-may kuni Tojikiston rahbari Emomali Rahmon bilan uchrashgan edi. Uchrashuv davomida tomonlar mintaqaviy xavfsizlik masalalariga to‘xtalib o‘tgan. Rossiya prezidenti Afg‘onistondagi voqealardan xavotir bildirib, Tojikiston ushbu mamlakat bilan eng uzun chegaraga ega ekanini ta’kidlagan. Emomali Rahmon, o‘z navbatida, Afg‘onistondan AQSh qo‘shinlarining olib chiqilishi e’lon qilinganidan keyin vaziyat keskinlashganiga ishora qilgan.
Putin Rossiya qurolli kuchlarini kuchaytirish bo‘yicha ish olib borayotganini qo‘shimcha qilib, tegishli maqsadli dastur mavjudligini eslatib o‘tgan.
Avvalroq Rossiyada Belarus va Armaniston bilan hamkorlikda tuzilgan mintaqaviy havo hujumiga qarshi mudofaa tizimlari mavjudligi aytilgan.
Mavzuga doir:
Izoh (0)