Бугунги кунда Ўзбекистондаги олис ва чекка ҳудудларда 143 та шифокор лавозими вакант. Бу ҳақда айни пайтда Президент Шавкат Мирзиёев раислигида ўтказилаётган йиғилишда давлат раҳбари қайд этди, дея хабар бермоқда «Дарё» мухбири.
«Яна бир масала – ‘Қишлоқ шифокори’ дастури доирасида олис ва чекка ҳудудларга шифокорларни жалб қилиш ишлари суст олиб борилмоқда.
Бундай ҳудудларга атиги 36 нафар шифокор ишга қабул қилинган. Жиззахда бирорта шифокор билан шартнома тузилмаган. Олис ва чекка ҳудудларда 143 та шифокор лавозими вакант, Сирдарёда 34 та, Сурхондарё 27 та ва Фарғонада 20 та.
Бундан ташқари, ишга қабул қилинган тиббиёт ходимларига 30 миллион сўмлик бир марталик тўловни амалга ошириш ҳам энди бошланмоқда — Навоийда (6 нафар) ва Фарғона (4 нафар).
А.Иноятов туман ва шаҳар ҳокимлари билан бирга, 10 та тиббиёт олийгоҳи ректорлари билан бирга, икки ҳафта муддатда камида 200 нафар битирувчини олис ва чекка ҳудудларга ишга юбориш бўйича контрактларни имзоласин.
Умуман, А.Иноятов оилавий шифокор пункти ва поликлиникаларда штатлар нормативи, шифокорлар ва ўрта тиббиёт ходимларига малака талаблари, жиҳозлаш стандартларини бундан буён ўзи тасдиқлайди.
Бирламчи бўғин учун жиҳозлар, дори ва тиббиёт воситалари сотиб олиш тендер комиссиясига ўзи раҳбарлик қилади. Оилавий шифокор пункти ва поликлиникалар раҳбарлари фаолиятини баҳолаш, уларни лавозимга қўйиш ва озод этиш масаласига ҳам ўзи жавоб беради», – деди давлат раҳбари.
Бундан аввал Шавкат Мирзиёев тиббиёт тизимида 5 та йўналишда жиддий ўзгаришлар қилинишини айтгани, Андижон, Хоразм ва Тошкент вилоятлари аҳолиси тиббиётдаги ишлар аҳволидан норози экани ҳамда Шавкат Мирзиёев 20 та туманнинг тиббиёт бирлашмалари фаолияти танқид қилгани ҳақида хабар берилганди.
Изоҳ (0)