Jahon sog‘liqni saqlash tashkiloti (JSST) rahbari Tedros Gebreyesus shahar va qishloqlarda avtomobil tezligini soatiga 30 kilometrgacha cheklash taklifi bilan chiqdi. Bu haqda Deutsche Welle xabar berdi.
Bu AQSh kabi o‘lchov birliklarining imperiya tizimidan foydalanadigan mamlakatlarda tezlik soatiga 20 mil (32,2 kilometr) bilan cheklanishini ko‘zda tutadi.
“Yo‘l-transport hodisalari bolalar va o‘smirlar o‘limining asosiy sababi hisoblanadi”, — deb ta’kidlaydi JSST rahbari.
JSST tomonidan taqdim etilgan ma’lumotlarga ko‘ra, dunyoda har 24 soniyada bir kishi YTH oqibatida vafot etadi. Tezlikni soatiga bir kilometrga oshirish o‘limga olib keladigan avtohalokat xavfini 4-5 foizga oshiradi.
“Koronavirusdan qutulib, qayta tiklanishimiz bilan, keling, xavfsiz dunyo uchun xavfsiz yo‘llarni quramiz”, — deb qo‘shimcha qilgan Tedros Gebreyesus.
Shuningdek, Streets for Life global kampaniyasi ham shahar hududida tezlikka qat’iy cheklovlar joriy etilishiga chaqirmoqda. Kampaniya ijtimoiy tarmoqlarda Love30 xeshtegidan foydalanmoqda.
Koronavirus pandemiyasi sababli ko‘pchilik uyida bo‘lgani uchun 2020-yilning boshidan buyon yo‘l-transport hodisalari soni kamaydi. Lekin YTH oqibatida halok bo‘lganlar soni kamaymadi. JSST ma’lumotlariga ko‘ra, yo‘llarning bo‘shab qolgani tufayli haydovchilardan katta qismining yuqori tezlikda harakatlanishi natijasida YTHlar ancha jiddiy tus olgan.
“Dunyoda har kuni 3000 nafar bola avtomobil yo‘llarida halok bo‘lmoqda yoki jarohatlanmoqda. Bu inson qo‘li bilan yaratilgan inqiroz, uni butunlay bartaraf etish mumkin”, — dedi bolalar salomatligini saqlash tashabbusining global elchisi va Janubiy Afrikaning sobiq prezidenti Nelson Mandelaning nabirasi Zolek Mandela. U mast haydovchi tomonidan sodir etilgan YTH oqibatida 13 yoshli qizidan ayrilgan.
Mandelaning qo‘shimcha qilishicha, Belgiya va Ispaniya kabi davlatlar yo‘llarda tezlikka cheklovlar joriy qilishni boshladi.
Izoh (0)