Жаҳон соғлиқни сақлаш ташкилоти (ЖССТ) раҳбари Тедрос Гебрейесус шаҳар ва қишлоқларда автомобиль тезлигини соатига 30 километргача чеклаш таклифи билан чиқди. Бу ҳақда Deutsche Welle хабар берди.
Бу АҚШ каби ўлчов бирликларининг империя тизимидан фойдаланадиган мамлакатларда тезлик соатига 20 мил (32,2 километр) билан чекланишини кўзда тутади.
«Йўл-транспорт ҳодисалари болалар ва ўсмирлар ўлимининг асосий сабаби ҳисобланади», — деб таъкидлайди ЖССТ раҳбари.
ЖССТ томонидан тақдим этилган маълумотларга кўра, дунёда ҳар 24 сонияда бир киши ЙТҲ оқибатида вафот этади. Тезликни соатига бир километрга ошириш ўлимга олиб келадиган автоҳалокат хавфини 4-5 фоизга оширади.
«Коронавирусдан қутулиб, қайта тикланишимиз билан, келинг, хавфсиз дунё учун хавфсиз йўлларни қурамиз», — деб қўшимча қилган Тедрос Гебрейесус.
Шунингдек, Streetс for Life глобал кампанияси ҳам шаҳар ҳудудида тезликка қатъий чекловлар жорий этилишига чақирмоқда. Кампания ижтимоий тармоқларда Love30 хештегидан фойдаланмоқда.
Коронавирус пандемияси сабабли кўпчилик уйида бўлгани учун 2020 йилнинг бошидан буён йўл-транспорт ҳодисалари сони камайди. Лекин ЙТҲ оқибатида ҳалок бўлганлар сони камаймади. ЖССТ маълумотларига кўра, йўлларнинг бўшаб қолгани туфайли ҳайдовчилардан катта қисмининг юқори тезликда ҳаракатланиши натижасида ЙТҲлар анча жиддий тус олган.
«Дунёда ҳар куни 3000 нафар бола автомобиль йўлларида ҳалок бўлмоқда ёки жароҳатланмоқда. Бу инсон қўли билан яратилган инқироз, уни бутунлай бартараф этиш мумкин», — деди болалар саломатлигини сақлаш ташаббусининг глобал элчиси ва Жанубий Африканинг собиқ президенти Нелсон Манделанинг набираси Золек Мандела. У маст ҳайдовчи томонидан содир этилган ЙТҲ оқибатида 13 ёшли қизидан айрилган.
Манделанинг қўшимча қилишича, Бельгия ва Испания каби давлатлар йўлларда тезликка чекловлар жорий қилишни бошлади.
Изоҳ (0)