Тошкентда ўз қизи ва набираси томонидан калтакланган онахонга ҳимоя ордери берилди. Бу ҳақда пойтахт ИИББ матбуот хизмати хабар берди.
Эслатиб ўтамиз, май ойи бошларида Тошкентда аёл ўзи қизи билан биргаликда онасини мунтазам равишда калтаклаб келгани маълум бўлганди. Ҳолат юзасидан Жиноят кодексининг 110-моддаси 2-қисми «а» банди (ожиз аҳволдалиги айбдорга аён бўлган шахсни қийнаш) билан жиноят иши қўзғатилган.
Тошкент шаҳар ИИББ матбуот хизмати хабарига кўра, яқинда Мирзо Улуғбек тумани ИИО ФМБ хотин-қизлар масалалари бўйича инспекторлари ушбу аёл бадан шикастлари билан ётқизилган туманидаги хусусий клиникалардан бирида бўлди. Даволовчи шифокордан унинг аҳволи ҳақида сўради.
Бундан ташқари, 3-сон ички ишлар бўлимида жабрланувчининг қизи 57 ёшли Саодат Г. ва набираси 32 ёшли Севара Г. иштирокида мазкур ҳолат муҳокамаси ўтказилган. Муҳокама давомида жабрланувчининг қизи ва набираси бадан шикастларига алоқадорликларини инкор этиб, қария аёлнинг ўзи бир неча бор йиқилганини айтган.
Барча тафсилотлар ўрганиб чиқилгач, кекса аёлга ҳимоя ордери беришга қарор қилинди. Унинг қизи ва набираси эса мазкур ҳужжат қоидаларини бузиш оқибати ҳақида огоҳлантирилган.
Айни пайтда жиноят иши бўйича тергов давом этмоқда.
Изоҳ (0)