Shavkat Mirziyoyev Qozog‘iston prezidenti Qosim-Jo‘mart To‘qayevni tug‘ilgan kuni bilan tabrikladi

O‘zbekiston Prezidenti Shavkat Mirziyoyev Qozog‘iston prezidenti Qosim-Jo‘mart To‘qayev bilan telefon orqali muloqot qildi.

Davlat rahbari Prezident Qosim-Jo‘mart To‘qayevni tavallud kuni bilan samimiy muborakbod etib, unga mustahkam sog‘lik, farovonlik va muvaffaqiyat tiladi.

Qozog‘iston prezidentining birodar mamlakatlar o‘rtasidagi ko‘p asrlik do‘stlik, yaxshi qo‘shnichilik va strategik sheriklik munosabatlarini mustahkamlashga qo‘shgan katta hissasi qayd etildi.

Oliy darajadagi muloqotlar ko‘p qirrali O‘zbekiston–Qozog‘iston munosabatlarining jadal sur’at bilan rivojlanishiga xizmat qilayotgani ta’kidlandi.

Suhbatda ikki tomonlama va mintaqaviy ahamiyatga molik dolzarb masalalar ko‘rib chiqildi. Avval erishilgan kelishuvlarning amalga oshirilishi hamkorlikning barcha ustuvor yo‘nalishlarda yanada kengayishiga xizmat qilishiga ishonch bildirildi.

Bundan avval Prezident matbuot kotibi joriy hafta Shavkat Mirziyoyev qatnashadigan tadbirlar haqida ma’lumot bergani, Shavkat Mirziyoyev O‘zbekiston xalq artisti Bahodir Yo‘ldoshev vafoti munosabati bilan hamdardlik bildirgani hamda Shavkat Mirziyoyev Tojikistonga tashrifi doirasida Xo‘jandga ham borishi kutilayotgani haqida xabar berildi.