Ижтимоий тармоқларда Самарқанд вилояти Пахтачи тумани ИИБ ЙҲХБ бошлиғи Мақсуд Тоғаев ҳаракатланган хизмат автомобилига сигнал чалган ҳайдовчининг автомобили жарима майдонига жойлаштирилгани тасвирланган видео тарқалди.
Видеодан кўриш мумкинки, Damas ҳайдовчиси йўлни тўсиб қўйган Nexia-3 автомобилига сигнал чалган. Шу вақт унинг ичидан туман ЙҲХБ бошлиғи тушиб келган ва ҳайдовчидан нимага сигнал чалганини сўраган. Damas ҳайдовчиси ҳаракатни давом эттириш учун чиқиб кетиши кераклигини айтганида, ЙҲХБ бошлиғи ўз ҳайдовчисига уни «жарима майдонига бервориш»ни буюрган.
Маълум қилинишича, Damas ҳайдовчиси Маъмурий жавобгарлик тўғрисидаги кодекснинг 135-моддаси (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) 1-қисми билан жарима майдонига жойлаштирилган.
UzNews нашрининг вилоят ИИБ матбуот хизмати раҳбари Жаҳонгир Сагдуллаевга таяниб ёзишича, ҳайдовчи билан муомала маданияти ва одоб-ахлоқ қоидалари тўғрисидаги буйруқ талабларини бузган Пахтачи тумани ИИБ ЙҲХБ бошлиғи Мақсуд Тоғаевга нисбатан хизмат текшируви тайинланган.
«Аминман, ‘Интизом устави’га мувофиқ интизомий жазо чораси қўлланилади ва буни расман эълон қиламиз. Ҳар қандай ҳолатда ҳам ходим фуқаролар билан аҳлоқ, одоб доирасида гаплашиши керак. Уялиб кетдим», — дейди вилоят ИИБ матбуот котиби.
Аввалроқ Тошкент вилоятида ўзини «Ойша хола» дея таништирган ЙПХ ходимига хизмат текшируви тайинлангани, Тошкентда ЙПХ инспектори ҳайдовчига ўрта бармоғини кўрсатгани, пойтахтда қуввати тугаганини айтиб, ишламаётган бодикамера билан текширув ўтказган ЙПХ ходимига чора кўрилгани ҳамда Самарқандда ЙПХ инспекторлари фуқарони куч ишлатиб, хизмат машинасида олиб кетгани акс этган видео бўйича расмий изоҳ берилгани ҳақида хабар берилганди.
Изоҳ (0)