Farg‘onada Malibu va velosiped ishtirokida yo‘l-transport hodisasi sodir bo‘ldi, deya xabar bermoqda YHXBB.
Qayd etilishicha, 2021-yil 4-may kuni soat 18:30 larda IIB YHXB navbatchilik qismiga yo‘l-transport hodisasi haqida xabar kelib tushgan. Unga ko‘ra Farg‘ona shahar Farg‘ona ko‘chasida Malibu rusumli avtomobilni boshqarib ketayotgan A.N. yo‘l qatnov qismiga velosipedida chiqqan U.M.ni urib yuborgan.
Oqibatda velosipedchi bosh hamda chap oyoq qismidan jarohat olib shifoxonaga olib borilgan. Ko‘rsatilgan yordamga qaramasdan jabrlanuvchi shifoxonada vafot etgan.
Hodisa sababi o‘rganilganda yo‘l sun’iy yoritish chiroqlari bilan jihozlanmagani aniqlandi.
Hodisadan avval Malibu haydovchisi 29–aprel kuni Ma’muriy javobgarlik to‘g‘risidagi kodeksining 135-moddasi 1-qismi (yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi) bilan javobgarlikka tortilgan.
Hozirda YTH yuzasidan tergovga qadar tekshiruv olib borilmoqda.
Bundan avval Buxoroda Matiz haydovchisi piyodalar yo‘lakchasidan o‘tayotgan maktab o‘quvchisiga yo‘l bermay, uning o‘limiga sababchi bo‘lgani, Jizzaxda voyaga yetmagan bola YTH sodir etgani hamda Qoraqalpog‘istonda Nexia, Cobalt va Damas ishtirokida sodir bo‘lgan YTH oqibatida 6 kishi halok bo‘lgani haqida xabar berilgandi.
Izoh (0)