Тиббиёт фанлари доктори Миралишер Исломов Республика ихтисослаштирилган гематология илмий-амалий тиббиёт маркази директори лавозимига тайинланди, деб хабар бермоқда Соғлиқни сақлаш вазирлиги матбуот хизмати.
Хабарда айтилишича, у фаолияти давомида Тошкент тиббиёт институти 1-клиникаси бўлим бошлиғи, ушбу клиниканинг Хирургия бўлими бош мутахассиси, даволаш ишлари бўйича бош шифокор ўринбосари, бош шифокори, шунингдек, Akfa Medline клиникасида тиббиёт технологиялари бўйича маслаҳатчи лавозимларида ишлаган. Бундан ташқари, у Тошкент шаҳар соғлиқни сақлаш бош бошқармаси бошлиғи вазифасида ҳам фаолият юритган.
Тайинловга қадар Қурилиш вазирлиги бош экспертизаси, тиббиёт технологияси бўйича бош мутахассис лавозимида ишлаб келган.
Маълумот учун, Тошкентда Республика ихтисослаштирилган гематология илмий-амалий тиббиёт маркази «Ўзбекистон Республикасида гематология ва трансфузиология хизматларини ривожлантириш ҳамда онкогематологик ва даволаш қийин бўлган касалликларга чалинган шахсларни янада қўллаб-қувватлаш чора-тадбирлари тўғрисида» Президент қарори билан 2020 йилнинг февраль ойида ташкил этилган.
Марказ аҳолига гематологик ва трансфузиологик ёрдам кўрсатиш, шундай касалликларнинг олдини олиш ва уларни даволаш, гематология соҳасида илмий изланишлар олиб боришга ихтисослашган.
Шавкат Мирзиёев 14 май куни ушбу марказга бориб, оққонга чалинган болалар ҳолидан хабар олганди.
Изоҳ (0)