Xitoy Falastinni qo‘llab-quvvatlaydi va Falastin-Isroil nizosini tartibga solishda yordamlashadi. Bu haqda Xitoy Xalq Respublikasi tashqi ishlar vaziri Van I o‘zining pokistonlik hamkasbi Shoh Mahmud Qurayshiy bilan telefon orqali suhbat chog‘ida aytib o‘tdi, deb yozadi “RBK” Xitoy Tashqi ishlar vazirligi saytiga tayanib.

“Xitoy o‘z qonuniy huquqlarining qaytarib berilishi uchun kurashayotgan Falastin xalqini haqqoniy ish bo‘yicha qo‘llab-quvvatlashda, mavjud muammolarni siyosiy muloqot yo‘li bilan tartibga solishda ko‘maklashishda davom etadi”, — deyiladi xabarda.

Van Ining so‘zlariga ko‘ra, Xitoyning fikricha, nizoni bartaraf qilishni ikki xalq uchun ikki davlat konsepsiyasi ta’minlashga qodir. Shu munosabat bilan BMT Xavfsizlik Kengashi Falastin va Isroilni ushbu formula asosidagi tinchlik muzokaralarini iloji boricha tezroq qayta boshlashga chaqirishi kerak, deya ma’lum qildi Xitoy TIV.

Ikki xalq uchun ikki davlat konsepsiyasi Isroil davlati bilan bir qatorda Iordan daryosi va O‘rta Yer dengizi oralig‘ida Falastin davlatini tuzish yo‘li bilan nizoga nuqta qo‘yishni ko‘zda tutadi.

Falastin-Isroil nizosining 2014-yildan buyon kuzatilgan eng kuchli avj olishi may oyida Isroil hukumatining Quddusda bir qator arab oilalarini ko‘chirib yuborish qaroridan keyin boshlandi. Bu noroziliklarni keltirib chiqardi hamda Quddusda arab namoyishchilar va Isroil politsiyasi o‘rtasidagi to‘qnashuvlarga sabab bo‘ldi.

Vaziyatga HAMAS aralashdi. Isroil uning politsiyani olib ketish haqidagi talablarini bajarmaganidan keyin, guruh raketalar otishni boshladi. Bunga javoban Isroil G‘azo sektorini o‘qqa tutdi.