Isroil G‘azoda Associated Press va Al-Jazeera idoralari joylashgan binoni vayron qildi. Harbiylar bino egasini zarbadan bir soat oldin ogohlantirgan (video)

G‘azo sektorida Isroil samolyotlari bergan zarbalar oqibatida Associated Press va Al-Jazeera nashrlarining idoralari joylashgan ko‘p qavatli bino vayron bo‘ldi, deb yozadi Meduza.

Zarba berishdan bir soatcha avval Isroil harbiylari bino egasiga qo‘ng‘iroq qilib, inshoot hujum nishoniga aylanishi va u yerdan odamlarni evakuatsiya qilish kerakligi haqida ogohlantirgan. Shundan keyin ogohlantirish sifatida bino tomiga kichik quvvatli snaryad tashlangan. Bino xo‘jayini harbiylarga murojaat qilib, jurnalistlar binodan zarur materiallarni olib ketishi uchun qo‘shimcha 10 daqiqa berishni so‘ragan, ammo uni rad etishgan.

OAVlar idoralaridan tashqari, binoda tijorat kompaniyalari ofislari va apartamentlar ham joylashgan edi.

Isroil Mudofaa armiyasining ta’kidlashicha, so‘nggi bir necha kun ichida vayron qilingan shu va boshqa ko‘p qavatli binolar HAMAS tomonidan jangovar maqsadlarda foydalaniladi, ammo tafsilotlar keltirilmadi. Isroilning Channel 12 telekanali ma’lumotlariga ko‘ra, binoda, ofislar bilan bir qatorda, jangarilar tomonidan foydalaniladigan qurol-yarog‘ omborlari, kibermarkazlar va aloqa tugunlari ham bo‘lgan bo‘lishi mumkin.

Associated Press agentligi Isroil jurnalistlar o‘tirgan binoni o‘z nishoni sifatida tanlaganidan “hayratga va dahshatga tushgani” haqida yozdi. “Bugun yuz bergan voqea oqibatida endi dunyo G‘azoda sodir bo‘layotgan hodisalar haqida kamroq narsa biladi”, — deyiladi agentlik bayonotida.

Hujum oqibatida jabrlanganlar haqida xabar berilmadi.

Ushbu voqea yuzasidan BMT bosh kotibi Antoniu Guterrish xavotir bildirdi. “Bosh kotib barcha tomonlarga shuni eslatadiki, fuqaro shaxslar va OAV tuzilmalariga nisbatan har qanday betartib (aniq bir harbiy nishonga qaratilmagan) zarbalar xalqaro huquqqa zid bo‘lib, har qanday yo‘l bilan ularning oldi olinishi kerak”, — dedi bosh kotibning rasmiy vakili Stefan Dyujarrik.

Isroil hamda HAMAS o‘rtasidagi nizo 10-mayda Isroil hukumatining Quddusdagi arab oilalarini ko‘chirish bo‘yicha qaror qabul qilganidan keyin ommaviy namoyishlar boshlanganidan so‘ng keskinlashgan.

10-maydan HAMAS Isroil hududiga raketa zarbalarini berishni boshlagan. Isroil mudofaa armiyasi mazkur harakatlarga javoban G‘azo sektorini bombardimon qildi. Shuningdek, Isroil armiyasi HAMAS razvedkasining ikki nafar yuqori lavozimdagi vakili yo‘q qilinganini, jangarilar harakatlanadigan ikkita tunnel tarmoqlariga, tashkilotning ofisiga zarba berilganini xabar qildi.

14-mayda Mashal Isroil bilan tinchlik sulhi tuzishga tayyor ekanligini bildirgan.