Isroil Misrning G‘azo sektorida gumanitar sulh haqidagi taklifini rad etdi. Bu haqda Al Arabiya kanali o‘z manbalariga tayanib xabar berdi, deb yozadi “RBK”.

Foto: Reuters

Uning ma’lumotlariga ko‘ra, Tel-Avivdagi muzokaralarda Misr delegatsiyasi Isroilga bir yil muddatga o‘t ochishni to‘xtatish haqidagi bitimni taklif qilgan, ayni vaqtda Qohira ushbu jarayonni muvofiqlashtirish majburiyatini o‘z zimmasiga olgan. Tashrif chog‘ida Misr tomoni falastinliklarni yarashuvga sodiq bo‘lib qoldira olishini ta’kidlagan.

Ammo Qohirada ma’lum qilishlaricha, Isroil taklifni rad etgan. Bunga javoban, telekanal manbalariga qaraganda, Misr bir qator yo‘nalishlar bo‘yicha Isroil tomoni bilan hamkorlikni to‘xtatib qo‘ymoqchi.

Misr ko‘pincha Isroil hamda G‘azo sektorini nazorat qiluvchi HAMAS harakati (bir qator mamlakatlarda, shu jumladan, AQSh va Yevroittifoqda terroristik tashkilot deb tan olingan) o‘rtasida vositachilik qiladi. Qohira vakillari dastlab HAMAS yetakchilari bilan uchrashdi, so‘ng Tel-Avivda isroilliklar bilan muzokaralar o‘tkazdi, deya ma’lum qilgan agentlikka Misr razvedkasidagi anonim manbalari.

“TASS” o‘z manbasiga tayanib xabar qilishicha, misrliklar doimiy yarashuvga erishish uchun birinchi bosqich sifatida vaqtinchalik o‘t ochishni to‘xtatishni taklif qilgan, ammo tashabbus qo‘llab-quvvatlanmagan va delegatsiya Tel-Avivni tark etgan.

13-may kuni kechqurun Isroil armiyasi uning havo va yer usti bo‘linmalari G‘azo sektorida hujum boshlaganini ma’lum qildi, unga jangovar samolyotlar, vertolyotlar, shuningdek, tanklar va artilleriya jalb qilindi. Yer ustidagi operatsiya haqida hozircha gap bormayapti, deb yozdi Times of Israel harbiylarga tayanib. HAMAS’ning “Izzeddinal-Qassam brigadalari” jangovar qanoti bunga javoban Isroil shaharlariga qarata 100 ta yangi raketa uchirilganini e’lon qildi.

Avvalroq Isroil armiyasi vakili Xidai Zilberman harbiylar G‘azo sektorida yer usti operatsiyasi rejalarini ishlab chiqayotganini ma’lum qilgandi. Channel 12 yuqori mansabli diplomatik manbasiga asoslanib, bu Isroil shiddatli raketa hujumiga javoban ko‘rib chiqayotgan variantlardan biri ekanini ma’lum qilgandi.

Isroil va Falastin o‘rtasidagi aloqalar Sharqiy Quddusda arab oilalarining ko‘chirib yuborilishi tufayli norozilik namoyishlari va to‘qnashuvlar fonida keskinlashdi. 10-may kuni vaziyatga HAMAS jangarilari aralashdi, Isroil mudofaa armiyasi javob harakatlarini amalga oshirmoqda.