Rossiyaning Qozon shahridagi (Rossiya tarkibiga kiruvchi Tatariston Respublikasi poytaxti) 175-sonli maktabda 11-may kuni ertalab otishma sodir bo‘ldi, deb yozadi Meduza.

Foto: “TASS”

Dastlabki ma’lumotlarga ko‘ra, qurollangan ikki kishi maktabga bostirib kirib, o‘quvchilarga qarata o‘q uzgan. Keyinroq hujum qilganlardan biri maktab kiraverishida hibsga olingan.

Baza agentligi uning ismi Ilnaz Galyaviyev ekani haqida yozdi. Agentlik ma’lumotlariga ko‘ra, 19 yoshli gumonlanuvchi to‘rt yil oldin maktabni tugatgan, hozirda kollejda o‘qiydi. Bir necha kun oldin u Telegram-kanal ochib, u yerda o‘zini “Xudo” deb atagan. Hodisadan avvalroq kanalda u “katta miqdordagi biologik chiqindilarni o‘ldirishi” va shundan so‘ng o‘z joniga qasd qilishi haqida yozgan

Foto: VK

Hujum qilgan ikkinchi shaxs ta’lim muassasasining to‘rtinchi qavatida qurshovga olingan. U bir necha kishini garovga olgan bo‘lishi mumkin, deb yozadi “Interfaks”.

Foto: VK

“RIA Novosti” favqulodda xizmatlarga asoslanib yozishicha, maktabdagi otishmadan keyin portlash sodir bo‘lgan. Mash xabariga ko‘ra, ikkinchi hujumchi maxsus operatsiya paytida o‘ldirilgan. Buni “Interfaks” va “TASS” manbalari ham tasdiqlamoqda. Tatariston rahbari Rustam Minnixanov, o‘z navbatida, jinoyatchi yolg‘iz harakat qilgani va “boshqa sheriklar aniqlanmaganini” aytdi. Ikkinchi hujumchi haqidagi ma’lumot politsiya tomonidan ham rad etildi.

Foto: VK

“RBK”  xabar berishicha, 41 yoshli Ramil Muxamedshin jinoyatchiga yordam berganlikda gumon qilinib hibsga olingan. Tatariston rahbarining matbuot xizmati sakkiz kishi — yetti nafar bola va bir o‘qituvchi halok bo‘lgani, 16 kishi jarohat olgani haqida xabar berdi. “RIA Novosti” ma’lumotlariga ko‘ra, otishmada kamida 11 kishi halok bo‘ldi. Shuningdek, 32 nafar jabrlanuvchi haqida ham xabar berildi, ulardan 16 nafari kasalxonada. Maktab binosi qurshab olingan. O‘quvchilar yaqin atrofdagi bolalar bog‘chasiga evakuatsiya qilingan. Ko‘plab maktab o‘quvchilari bino derazalaridan sakragan. Ularning ikki nafari halok bo‘lgan.

Ichki ishlar vazirligi otishma tugaganidan keyin aksilterror operatsiyasi rejimi joriy qilingani haqida e’lon qildi. 11-may kuni Qozon shahridagi barcha maktablarda ikkinchi smenadagi darslar bekor qilindi.

Foto: “RIA Novosti”

Business Online gazetasining yozishicha, politsiya shuningdek, Tuganlik ko‘chasidagi 10-raqamli uyga jo‘nab ketgan. Ta’kidlanishicha, hibsga olingan o‘smir o‘zining yashash joyiga bomba qo‘yganini aytgan. Huquqni muhofaza qilish idoralari zudlik bilan kvartirani zararsizlantirish harakatida.

Huquq-tartibot idoralari xodimlari boshqa ta’lim muassasalarida otishma bo‘lgani haqidagi ma’lumotlarni rad etdi, bu haqda soxta xabar tarqatgan ikki kishi hibsga olindi.

Otishmada halok bo‘lganlar xotirasiga bag‘ishlab Tataristonda 12-may motam kuni deb e’lon qilindi.