Россия президенти Владимир Путин Қозон шаҳрининг 175-сонли мактабида юз берган отишма пайтида болаларни қутқарган мактаб ўқитувчилари ва ходимларига давлат мукофотлари топшириш тўғрисида кўрсатма берди, деб ёзади Meduza.
Хабарга кўра, ҳукумат аъзолари билан учрашувда сўзга чиққан президент Қозондаги қирғинни «даҳшатли офат» ва «ваҳший жиноят» деб атади.
«Фожиа, албатта, барчамизни ҳайратда қолдирди. Оғир кунларда бутун Россия Қозон аҳолиси билан, Татаристон билан бирга бўлди ва шундай бўлиб қолмоқда. Мамлакатнинг барча минтақалари аҳолиси дилдан қўллаб-қувватлаш ва ҳамдардлик сўзларини айтишга, Қозон фуқароларининг дардини ўз дардидек қабул қилишга интилмоқда. Мен яна бир бор қурбонларнинг оилаларига, энг қадрли бойлиги — фарзанди, набираси, яқинлари ва қариндошларини йўқотган мазкур оилаларга чуқур ҳамдардлик билдираман», — деди Путин.
Президент, шунингдек, фуқаролик қуроллари эгаларига қўйиладиган талабларни кучайтириш, уларнинг муомаласи устидан назоратни ошириш ва қурол олиш учун тиббий маълумотномаларни сотиб олиш имкониятини истисно қилиш тўғрисида кўрсатма берди.
Эслатиб ўтамиз, 11 май куни 19 ёшли Илназ Галявиев ўзи илгари ўқиган Қозон шаҳридаги 175-сонли гимназияга келиб, ўқувчилар ва ўқитувчиларга ўқ узишни бошлади. Тўққиз киши жумладан етти нафар мактаб ўқувчиси вафот этди, яна 23 киши, асосан болалар, жароҳат олди.
Ҳужум қилган шахс ҳибсга олинди. Қўлга олинганидан кейин, биринчи сўроқ пайтида Галявиев 2020 йил ёзида ўзида «махлуқ уйғонишни бошлагани» ва «ҳаммадан янада кўпроқ нафратланишни» бошлаганини айтди. Икки ой аввал эса Галявиев, ўзининг сўзларига кўра, ўзининг «худо» эканини англаб етган ва ҳатто бу ҳақда ўз онасига ҳам сўзлаб берган.
Текширув натижаларига кўра Галявиевга 2020 йилда бош мия касаллиги ташхиси қўйилган.
Шунингдек, 12 май куни Қримнинг Қизил гвардия туманида ижтимоий тармоқларда маҳаллий лицейни портлатиш таҳдиди билан пост қолдирган эркак ҳибсга олинди. Қрим ҳуқуқ-тартибот органларининг маълумотларига кўра, қонунбузар шу йўл билан махсус хизматларнинг фаолиятини текшириб кўрмоқчи бўлган.
13 май куни Россиянинг яна бир шаҳрида мактабни портлатиш билан таҳдид қилган ўсмир ҳибсга олинди. Қозон шаҳридаги мактабга қилинган ҳужумга оид видео остидаги изоҳларда «Худо сизга ҳакам» ники остида хабар қолдирган ўсмир «Эртага Благовешенск шаҳрининг 27-мактабида мен ҳам шундай қиламан» деб ёзган. Зудлик билан ҳибсга олинган ўсмир терговчиларга «шунчаки ҳазиллашганини» айтган.
Изоҳ (0)