AQShning Yuta shtatidagi shosselarning birida dunyodagi eng tezkor giperkarlardan biri hisoblanuvchi SSC Tuatara avariyaga uchradi. Giperkar ortilgan avtovoz haydovchisi kuchli shamol vaqtida boshqaruvni eplay olmagani va yuk mashinasi ag‘darib yuborgan, deb xabar beradi Motor.
Shelby Super Cars North America kompaniyasi Tuatara’ni 2011-yilda taqdim etgan. Biroq dastlab rejalashtirilgan 100 ta seriyali giperkarning birinchisi oradan to‘qqiz yil o‘tgach konveyerdan chiqqan. 1247 kilogrammli orqa uzatmaga ega avtomobilga 1775 ot kuchini taqdim etishga qodir 5,9 litrli V8 dvigateli o‘rnatilgan. Agregat yetti pog‘onali “robot” uzatmalar qutisi yordamida boshqariladi.
Birinchi seriyali SSC Tuatara’ning narxi 1,9 million dollarni tashkil etgan.
2021-yilning yanvar oxirida SSC Tuatara uchinchi urinishda seriyali avtomobillar o‘rtasida tezlik rekordini o‘rnatgan edi. Mashina Floridadagi aerodromning uchish-qo‘nish yo‘lagida soatiga 455,3 kilometr tezlikda harakatlanib, Ginnesning rekordlar kitobidan joy olgan. Bundan oldingi rekord 2017-yilda Koenigsegg Agera RS’ga tegishli edi — soatiga 447 kilometr.
SSC North America kompaniyasi o‘z rekordini yangilash niyatida bo‘lgan. SSC Tuatara’ni soatiga 482 kilometr tezlikda haydash rejalashtirilgan edi. Buning uchun noyob giperkar Florida aerodromiga yetkazilishi kerak bo‘lgan. Biroq uni olib ketish vaqtida shosselarning birida esgan kuchli shamol sabab avtovaz haydovchisi boshqaruvni yo‘qotib, avariyaga uchragan. SSC Tuatara belgilangan joyga yetishiga 40 kilometrgina qolgandi.
YTH oqibatida giperkarning kuzoviga jiddiy shikast yetgan. Biroq Shelby Super Cars rahbari Jerod Shelbining so‘zlariga ko‘ra, mashinaga u qadar katta zarar yetmagan. Kompaniya endilikda avtomobilning barcha zaruriy ehtiyot qismlarini qayta tiklashi kerak.
Eslatib o‘tamiz, 2020-yilda AQShda noyob Ford Mustang yangi egasiga yetib bormasdan avariyaga uchragandi.
Izoh (0)