Qashqadaryo viloyati Kasbi tuman “Toshqo‘rg‘on” mahallasi hududidan o‘tuvchi 4R-92 Qarshi—Talliqo‘rg‘on—Kasbi—Jeynov avtomobil yo‘lining 26 kilometrida sodir bo‘lgan YTH oqibatida 7 kishi halok bo‘ldi. Bu haqda tuman hokimligi matbuot xizmati xabar berdi.
Ma’lum qilinishicha, 8-may kuni soat 22:10 larda harakat qoidalarini qo‘pol ravishda buzib, katta tezlikda harakatlangan “VAZ-2101” avtomobili yo‘lning qarama-qarshi tarafida harakatlanib kelayotgan Nexia-2 bilan to‘qnashib ketgan. Sodir bo‘lgan avariya oqibatida yetti kishi halok bo‘lgan. Yana ikki fuqaro turli tan jarohatlari bilan shifoxonaga yetkazilgan.
Mudhish YTH oqibatida halok bo‘lganlarning orasida 1 va 4 yoshli bolalar ham bor. Qolganlari hali 40 yoshga yetmagan fuqarolar.
Avvalroq Qarshida sodir bo‘lgan YTHda 29 yoshli haydovchi va uning 5 yoshli qizi halok bo‘lgani, Buxoroda qarshisidagi mashinani quvib o‘tishga uringan Nexia traktorga borib urilgani va haydovchi shifoxonada vafot etgani to‘g‘risida xabar berilgandi.
Izoh (0)