Tesla kompaniyasi xavfsizlik kamarini taqmagan holda harakatlanish imkonini bermaydigan yangi ixtirosini patentladi. Improper seatbelt usage detection (“Xavfsizlik kamaridan noto‘g‘ri foydalanishni aniqlash”) yoki ISUD nomini olgan tizim xavfsizlik kamari to‘g‘ri taqilmagan holda avtomobilning joyidan siljishiga imkon bermaydi, deb yozadi Motor.
Tesla mazkur patent uchun arizani 2019-yilda bergan, biroq endigina bunga ruxsat oldi. G‘alati tasodifga ko‘ra, hujjatlarning taqdim etilishi elektrokarlar xavfsizligiga bog‘liq mojaro va surishtiruvlar paytiga to‘g‘ri kelgan.
2020-yilda internetda Tesla’ni boshqarib ketayotgan bloger o‘zini uxlayotganga solib olgani, biroz o‘tib orqa o‘rindiqqa yotib olgani tasvirlangan video paydo bo‘lgandi. Elektrokar avtopiloti bunga e’tibor qaratmasdan, haydovchi o‘rindig‘i bo‘sh bo‘lgan holda ham hech narsa bo‘lmagandek, harakatlanishni davom ettirgan.
Biroq aprel oyida sodir bo‘lgan avariya ko‘pchilikni tashvishga solib qo‘ydi — bunda Tesla rulida hech kim bo‘lmagan. G‘ayrioddiy YTHdan so‘ng Consumer Reports ekspertlari tajriba o‘tkazib, avtomobilni “aldab”, u haydovchisiz ham harakatlana olishini isbotlab bergandi.
ISUD tizimi ushbu kamchiliklarni bartaraf etishga qaratilgan. U o‘rindiqlar va xavfsizlik kamaridagi datchiklarning ma’lumotlari asosida ishlaydi. Agar ISUD kamar noto‘g‘ri taqilganini aniqlasa, tegishli xabar multimedia tizimida paydo bo‘ladi yoki ovozli xabar beriladi. Shu bilan birga, elektrokar joyidan siljimaydi. Mazkur tizim Tesla avtomobillariga qachondan joriy etilishi hozircha noma’lum.
Avvalroq xitoyliklar Tesla elektrokarlarining tepkilarini videoga olish uchun kamera o‘rnatishni boshlagani, bunga so‘nggi vaqtda YTHlar ortgani sabab bo‘layotgani to‘g‘risida xabar berilgandi.
Izoh (0)