Hindistonda COVID-19’dan tuzalgan odamlarda kuzatilayotgan “qora zamburug‘” — mukormikoz kasalligi global xavf keltirib chiqarmaydi. Bu haqda rossiyalik virusologlarga tayanib “RBK” xabar berdi.
“Mukormikoz endemik kasallik hisoblanadi. U Janubi-sharqiy Osiyo mamlakatlarida keng tarqalgan. O‘ta keng tarqalgan deb bo‘lmaydi, ammo Hindistonda immunitetning pastligi, yuqumli kasallikning ko‘payishi va haddan tashqari zichlik sharoitida turli xil infeksiyalarni uchratish mumkin”, — dedi Rossiya Iqtisodiyot Oliy maktabi Sog‘liqni saqlash iqtisodiyoti instituti direktori Larisa Popovich.
“Mukormikoz og‘ir kasallik, ammo uni davolash mumkin. Infeksiya turmush tarzi Hindistondagi mahallalar singari to‘yib ovqatlanmaydigan, qashshoqlikda va antisanitariya sharoitida yashaydigan odamlarda kasalliklarga chidamlilik pasaygani sababli tez tarqaladi”, — deya qo‘shimcha qildi u.
Mutaxassis ta’kidlashicha, har qanday parazitli, zamburug‘ infeksiyalari immuniteti pasaygan barcha odamlar uchun xavfli bo‘lib, har qanday surunkali kasallik tanaga va immunitet tizimiga jiddiy ziyon keltiradi.
“Infeksiyaning istalgan turi surunkali kasalligi bor odamlarda tezroq tarqaladi. Buni COVID tarixida ko‘rish mumkin. Boshqa har qanday yuqumli kasallik bilan ham xuddi shunday holat kuzatiladi”, — deya xulosa qildi Popovich.
O‘z navbatida, Moskva davlat universiteti professori, biologiya fanlari doktori, virusolog Aleksey Agranovskiy “qora zamburug‘”ga chalinish va koronavirus o‘rtasida parallellik o‘rnatish uchun hech qanday sabab ko‘rmasligini ta’kidladi.
“Umuman olganda, immuniteti pasaygan odamlarda mikroorganizmlar keltirib chiqaradigan kasalliklarga chalinish xavfi yuqori. Ularga yordam beradigan maxsus davolar mavjud. Ammo nima uchun COVID-19’ni davolashda immunosupressiya (immunitetni sun’iy ravishda bostirish) paydo bo‘lishi kerakligi noaniq. Bu immunodepressiv kasallik emas. Harqalay mendagi ma’lumotlar bo‘yicha, virus umumiy immunitetning pasayishiga olib keladigan biron-bir belgini ko‘rmadim. Shunga ko‘ra, men COVID-19 bilan ‘qora zamburug‘’ yoki boshqa xavfli kasalliklarni yuqtirish o‘rtasida parallellik bor deya olmayman”, — dedi Agranovskiy.
Ma’lumot uchun, ba’zan qora po‘panak (black fungus) deb ham ataluvchi mukormikoz COVID-19’ga chalingan bemorlarda yoki koronavirusdan sog‘ayganlarda tez-tez uchraydi.
Mukormikoz — kamdan kam uchraydigan kasallik bo‘lib, uning belgilari og‘riq va bezgakni keltirib chiqaruvchi burun va tanglayning nekrotik zararlanishidan iborat. Bundan tashqari, markaziy asab tizimi tomonidan ham simptomlar yuzaga kelishi mumkin, bemorlar ko‘zning shishi va og‘rishidan shikoyat qiladi. Kasallik natijasida burun bo‘shlig‘i, miya va o‘pkalarga zarar yetadi. U diabet hamda OIV/OITS va saraton bilan kasallanganlar uchun o‘lim keltiradigan darajada xavflidir. Mukormikozdan o‘lim darajasi 50 foizgacha yetishi mumkin.
Hindistonda koronavirusning ikkinchi to‘lqini “quturayotgan” bir paytda mahalliy shifokorlar mukormikoz infeksiyasini tobora ko‘proq qayd etmoqda.
Izoh (0)