Rossiya Tashqi ishlar vazirligi Ruminiya elchixonasida mudofaa masalalari bo‘yicha attashening yordamchisi lavozimida ishlagan diplomatning mamlakatdan chiqarib yuborilishini e’lon qildi, deb yozmoqda “RBK”.
Bu Ruminiyaning 26-aprelda rossiyalik diplomatni mamlakatdan chiqarib yuborganiga javob harakat bo‘ldi.
“11-may kuni Ruminiya elchisi K.Istrate Rosssiya TIVga chaqirtirildi va unga mudofaa masalalari bo‘yicha attashe yordamchisi, kapitan G.Iliyeskuning persona non grata deb e’lon qilingani haqidagi nota topshirildi. Ruminiya elchixonasining ushbu xodimi 72 soat ichida Rossiya hududini tark etishi shart”, — deyiladi Rossiya TIV xabarida.
Ruminiya TIV 26-aprelda rossiyalik diplomatni ortga qaytarib yuborganida, uning 1961-yilda qabul qilingan Vena konvensiyasini buzganini ro‘kach qilgandi. Bunga qadar Chexiya TIV Moskvaning Vrbetitsadagi portlashga aloqadorligi haqidagi mojaro ortidan, Yevroittifoq hamda NATOdagi ittifoqdoshlariga murojaat qilgan va rossiyalik diplomatlarni josus hisoblab, mamlakatdan chiqarib yuborishni so‘ragandi.
Rossiya va Chexiya o‘rtasidagi diplomatik nizo Praganing 18 nafar rossiyalik diplomatni ortga qaytarib yuborishni e’lon qilganidan keyin boshlandi. Chexiya Rossiyani 2014-yilda Vrbetitsa qilshog‘idagi qurol-yarog‘lar omborida portlash uyushtirganlikda ayblagan va mazkur qo‘poruvchilik harakatlariga Rossiya razvedkasining aloqasi borligini gumon qilgan. Rossiya ayblovlarni asossiz va mantiqsiz deb atagan, Praganing harakatiga javoban 20 nafar chexiyalik diplomatni vataniga qaytarib yuborgan. Shu tariqa, ikki tomonga bir necha marta diplomatlar qaytarilgan. Chexiyadan keyin Slovakiya, Boltiqbo‘yi mamlakatlari, Bolgariya, Ukraina ham rossiyalik diplomatlarni o‘z hududlaridan chiqarib yubordi. Rossiya ham ularning harakati qarshi harakat bilan javob qilgan.
Izoh (0)