Ozarbayjon prezidenti Qorabog‘dagi mojaro hal qilingani va bu masalaga qaytish befoydaligini aytdi

Ozarbayjon prezidenti Ilhom Aliyev Qorabog‘ mojarosi hal qilinganini va bu masalaga qaytishdan foyda yo‘qligini aytdi, deb yozadi “RIA Novosti”.

“Takror aytaman, urushdan keyin Tog‘li Qorabog‘ mojarosi hal qilingani haqida men bir necha bor aytganman. Ozarbayjon ushbu mojaroni jang maydonida ham, muzokara stolida ham yakka o‘zi hal qildi. Jang maydonidagi g‘alaba dushmanni oq bayroq ko‘tarishga va taslim bo‘lish aktiga imzo chekishga majbur qildi. 10-noyabrda imzolangan hujjat Armanistonning taslim bo‘lish aktidir. Ozarbayjonda Tog‘li Qorabog‘ degan hududiy birlik yo‘q. Mojaro hal qilindi va bu masalaga qaytish befoyda deb o‘ylayman. Qanday bo‘lmasin, biz buni urushdan keyingi davrda namoyish etdik”, — dedi Aliyev Ozarbayjon davlat televideniyesiga bergan intervyusida.

Uning so‘zlariga ko‘ra, “agar kimdir Tog‘li Qorabog‘ mojarosi hal qilinmagan deb hisoblasa, bu uning muammosi”.

“Ikkinchidan, bu o‘ta xavfli yondashuv. Agar mojaro hal etilmagan bo‘lsa, unda uni qanday hal qilish kerak? Demak, bu 10-noyabrda imzolangan bayonot o‘z kuchini yo‘qotganini bildiradimi? Men buni shunday tushunaman. 10-noyabrda nizoni hal etish to‘g‘risidagi hujjat imzolangan. Bu hujjat ba’zilar nazdidagi kabi faqat o‘t ochishni to‘xtatish haqida emas. Ko‘zlarini kattaroq ochib, unda yana qancha band borligini ko‘rishsin. O‘t ochishni to‘xtatish to‘g‘risidagi hujjatda yana ko‘plab masalalar, jumladan, kommunikatsiyalarni yo‘lga qo‘yishni ko‘rib chiqish haqidagi bandlar ham bor. Agar ziddiyat hal etilmasa, qanday kommunikatsiya haqida gap bo‘lishi mumkin? Mojaro tugamagan bo‘lsa, unda nega Ozarbayjon, Armaniston va Rossiya bosh vazirlarining o‘rinbosarlari uchrashuvlar o‘tkazib, kelishuvlarga erishmoqda?”— dedi Aliyev.

Shuningdek, u Armaniston hududlarining qaytarilishi va Tog‘li Qorabog‘ning maqomi to‘g‘risidagi bayonotlardan voz kechishga chaqirdi. “Gapni ko‘paytirmaslik va munosabatlarimizni yomonlashtirmaslik uchun maqom yoki mojaro haqida hech qanday bayonot bermaslikni maslahat beraman”, — dedi Aliyev.

2020-yilning sentabr oyi oxirida Tog‘li Qorabog‘da Ozarbayjon va Armaniston davlatlari o‘rtasida qurolli nizo kelib chiqqan edi. 2020-yilning 10-noyabrida o‘t ochishni to‘xtatish to‘g‘risidagi uch tomonlama kelishuv imzolanishi bilan nizolar yakuniga yetdi. Unga ko‘ra, Boku Tog‘li Qorabog‘ bilan qo‘shni yetti viloyat, shuningdek, Shusha va Gadrut shaharlari ustidan nazoratni qayta tikladi. Hududning qolgan qismiga Rossiya tinchlikparvarlari joylashtirildi. Bundan tashqari, kelishuv Ozarbayjon va Armaniston o‘rtasidagi aloqalar va savdo-iqtisodiy munosabatlarning boshlanishini nazarda tutadi.