Xitoyning Gonkong shahrida ikki kishi Promise sudxo‘rlik kompaniyasiga bostirib kirib, xodimlarni qo‘rqitish uchun suv otadigan o‘yinchoq to‘pponchadan foydalandi. Erkaklar 200 million gonkong dollari (25,7 million AQSh dollari) talab qilgan, deb yozadi South China Morning Post.
Xabarga ko‘ra, politsiya gumonlanuvchilardan biri — 27 yoshli ishsiz erkakni hibsga olgan. Ayni paytda uning taxminan 30 yoshlarda bo‘lgan sherigi qidirilmoqda.
Politsiya manbalarining ta’kidlashicha, kompaniya xodimlari o‘yinchoq bilan tahdid qilinayotganini tushungan, chunki “qurol” shaffof ko‘k rangda va plastikdan yasalgan. Ko‘p o‘tmay bosqinchilar qochib ketgan, ammo keyin ulardan biri qaytib kelgan.
“Bu safar u qo‘lida qalam ushlab olgan. Peshtaxtadan sakrab o‘tib, xodimalardan biriga politsiyani chaqirishni buyurib, tahdid qilgan”, — dedi nashrning manbasi.
Politsiya vakilining aytishicha, hech narsa o‘g‘irlanmagan va hech kim jabrlanmagan. Ta’kidlanishicha, gumonlanuvchi ruhiy kasal bo‘lmasa ham, u psixologik ko‘rik uchun kasalxonaga yuborilishi mumkin.
Izoh (0)