Bolgariya prezidenti Rumen Radyev Milliy assambleya (parlament)ni tarqatib yuborish va 11-iyulda parlament saylovlarini o‘tkazish to‘g‘risidagi farmonni imzoladi. Bu haqda davlat rahbari matbuot xizmatiga tayanib “TASS” xabar berdi.
“Prezident Rumen Radyev o‘zining farmoni bilan 2021-yil 12-mayda bo‘lib o‘tadigan 45-Xalq assambleyasini tarqatib yubordi. Davlat rahbari parlament saylovlarini joriy yilning 11-iyuliga belgiladi”, — deyiladi xabarda.
Shuningdek, Bolgariya prezidenti 12-maydan boshlab 46-chi Xalq assambleyasiga yangi saylovlar o‘tkazilgunga qadar mamlakatni boshqaradigan texnik hukumatni tayinlash to‘g‘risidagi farmonni imzoladi. Xavfsizlik va mudofaa bo‘yicha davlat rahbarining sobiq kotibi Stefan Yanev texnik kabinetning bosh vaziri etib tayinlandi.
Bolgariyaning texnik hukumati uchun rasmiy taqdimot marosimi 12-may kuni bo‘lib o‘tadi, o‘sha kuni prezident Rumen Radyev o‘z faoliyatidagi ustuvor yo‘nalishlarni ham taqdim etadi.
Bolgariyaning 45-Xalq assambleyasi 4-aprelda saylangan, ammo mamlakatning yangi hukumatini tuzish borasida kelisha olmagan. Dastlab g‘olib bo‘lgan “Fuqarolar Bolgariyaning yevropacha taraqqiyoti tarafdori” partiyasi “Demokratik kuchlar ittifoqi” bilan koalitsiyada hukumat tuzishga urindi, ammo parlamentdagi ko‘pchilikning qo‘llab-quvvatloviga erisha olmadi.
“Shunday xalq bor” yangi siyosiy partiyasi o‘zining Vazirlar Mahkamasini taklif qilish huquqidan bosh tortdi. “Bolgariya Sotsialistik partiyasi Bolgariya uchun” koalitsiyasi ham o‘z vakolatlarini prezidentga qaytarishga majbur bo‘ldi.
Hukumat tuzishning iloji yo‘qligi sababli Bolgariya prezidenti parlamentni tarqatib yuborish va texnik kabinetni tayinlash to‘g‘risida qaror qabul qildi.
Avvalroq Isroil bosh vaziri Binyamin Netanyaxu belgilangan vaqt ichida hukumat tuza olmagan edi. Agar hukumat tuzilmasa, Isroil parlamenti tarqatib yuboriladi va mamlakatda yangi saylovlar o‘tkazishga to‘g‘ri keladi, bu hol 2019-yil aprelidan beri besh marta kuzatilgan.
Izoh (0)