Prezident Shavkat Mirziyoyev raisligida 12-may, chorshanba kuni o‘tkazilgan yig‘ilishda davlat rahbari may—iyun oylarida oilaviy tadbirkorlik dasturlariga 1,6 trillion so‘m mablag‘ ajratish orqali kamida 30 ming nafar ishchi o‘rni yaratish kerakligini ta’kidladi. Bu haqda “Daryo” muxbiri xabar bermoqda.
“Mas’ul vazirlik va tashkilot rahbarlari, viloyat hokimlari bilan birga, past quvvatlarda ishlayotgan 30 mingta, shu jumladan, sanoatda – 6 mingta, qurilishda – 2,5 mingta, savdo, umumiy ovqatlanish va xizmatlar sohasida – 18 mingta tadbirkorlik subyektlarining faoliyatini ikkinchi chorakda jonlantirish bo‘yicha aniq choralar ko‘rishi lozim.
Xususan, Toshkent viloyatida – 6 mingta, Toshkent shahrida – 4,3 mingta, Andijonda – 3,7 mingta. Tadbirkorlarni uyg‘otishimiz kerak, ularning muammosini yechishga yordam berish zarur.
Xolxo‘jayev, Zoxidov, Ikramov, Kudbiyev, viloyat hokimlari bilan birga, o‘tgan yili boshlangan tajribani davom ettirgan holda, o‘zlariga biriktirilgan hududlarga chiqib, joriy yil 1-iyulgacha ushbu korxonalarning muammolarini hal qilishga ko‘maklashadi.
Bundan tashqari, Zoxidov tijorat banklari bilan birga, may—iyun oylarida oilaviy tadbirkorlik dasturlariga 1,6 trillion so‘m mablag‘ ajratishi, viloyat, tuman va shahar hokimlari bu orqali kamida 30 ming nafar fuqaroga daromad manbai uchun sharoit yaratishi kerak.
Shuningdek, viloyat, tuman va shahar hokimlari may—iyun oylarida hududiy dasturlar doirasida – 13 mingta, bo‘sh yer uchastkalarini sotish orqali – 5 mingta, Bandlik, Xotin-qizlar va Yoshlar jamg‘armalari hisobidan qo‘shimcha 10 mingta yangi ish o‘rinlarini tashkil etishi lozim. Xusanov, Ikramov, Rafikov, Sa’dullayev, Xolxo‘jayev ushbu topshiriqlar ijrosiga mas’ul bo‘ladilar”, — dedi davlat rahbari.
Mavzuga doir:
Izoh (0)