Техник пахта чигитларининг биржа нархи 31,2 фоизга пасайган ва 12 май ҳолатига кўра бир тонна учун ўртача 3 миллион 403,9 минг сўмни ташкил этган. Бу ҳақда 6—12 май кунлари Ўзбекистон товар-хом ашё биржасида ўтказилган очиқ савдо натижалари бўйича маълумотда маълум қилинди.
Қайд этилишича, 2021 йил 6—12 май кунлари Ўзбекистон товар-хом ашё биржасида ўтказилган очиқ биржа савдолари якунларига кўра техник пахта чигитининг биржадаги нархи 31,2 фоизга пасайиб, 12 май ҳолати бўйича маҳсулотнинг бир тоннаси учун ўртача 3 миллион 403,9 минг сўмни ташкил этди.
Кўриб чиқилаётган даврда биржа савдоларига сотувчи корхоналар томонидан 7961 тонна пахта чигити қўйилди ва улардан 5903 тоннаси, яъни 74,1 фоизи сотилди.
Техник пахта чигитининг биржадаги нархлари пасайишига унинг бошланғич нархларини сотувчи корхоналар, яъни пахта-тўқимачилик кластерлари томонидан пасайтирилганлиги ўз ижобий таъсирини ўтказган.
Хусусан, ўтган даврда пахта-тўқимачилик кластерлари биржа савдоларига қўйиладиган пахта чигитининг бошланғич нархларини маҳсулотнинг бир тоннаси учун ўртача 4 миллион 781 минг 900 сўмдан 2 миллион 933 минг 300 сўмгача, яъни 38,7 фоизга пасайтирди.
Техник пахта чигити нархининг пасайиши оқибатида пахта ёғининг бошланғич қиймати ва биржадаги нархлари ҳам пасайди. Хусусан, ўтган даврда пахта ёғининг бошланғич нархи ўртача 5,3 фоизга, биржа савдолари натижасида шаклланган нархи эса мос тарзда 11,3 фоизга пасайиб, бугунги кунда маҳсулотнинг бир тоннаси учун 14 миллион 739,3 минг сўмни ташкил қилади.
Эслатиб ўтамиз, бундан аввал Монополияга қарши курашиш қўмитаси биржада техник чигитнинг бошланғич нархларини келишиб, сунъий ошириш аломатлари билан 34 та пахта кластерига нисбатан иш қўзғатган эди.
Изоҳ (0)