Toshkentning Olmazor, Mirobod va Yakkasaroy tumanlarida davlat organlari va tashkilotlari joylashgan yer uchastkalari, bino va inshootlar inventarizatsiya qilinadi. Bu haqda Prezidentning “Xizmatlar sohasini jadal rivojlantirish chora-tadbirlari to‘g‘risida”gi qarorida ko‘zda tutilgan.
Ushbu hududlar davlat organlari va tashkilotlari joylashgan yer maydonlari va bino-inshootlardan samarali foydalanishni ta’minlash bo‘yicha ishchi guruh tomonidan tanqidiy ko‘rib chiqiladi. Ishchi guruhga bosh vazir o‘rinbosari, iqtisodiy taraqqiyot va kambag‘allikni qisqartirish vaziri Jamshid Qo‘chqorov rahbarlik qiladi.
Ko‘rib chiqish yakunlariga ko‘ra, ishchi guruh tadbirkorlik subyektlariga xizmat ko‘rsatish obyektlarini barpo etish uchun ajratish maqsadida maqbullashtirish bo‘yicha Vazirlar Mahkamasiga takliflar kiritadi.
Bundan tashqari, ishchi guruhga ijtimoiy va ishlab chiqarish infratuzilmasini rivojlantirish dasturlari doirasida davlat organlari va tashkilotlari uchun bino va inshootlar qurishni maqbullashtirgan holda ularni tadbirkorlik subyektlariga tegishli binolarda ijara asosida joylashtirish tizimini keng joriy qilish choralarini ko‘rish topshirilgan.
Eslatib o‘tamiz, 10-may kuni davlat xizmatlari ko‘rsatish sohasidagi islohotlar natijadorligiga oid taqdimot bilan tanishgan Shavkat Mirziyoyev sohani yanada rivojlantirish, aholiga qulayliklarni oshirish bo‘yicha ustuvor vazifalarni belgilab bergandi.
Xususan, xorijiy tajriba asosida, 2021-yil yakunigacha davlat xizmatlari markazlari orqali ko‘rsatiladigan xizmatlar sonini 200 taga yetkazish vazifasi qo‘yildi. Barcha 716 ta davlat xizmatini inventarizatsiya qilib, ularning muddatlari, to‘lov miqdorlari, shartlari va boshqa talablarini soddalashtirish bo‘yicha ko‘rsatma berildi.
Avvalroq Prezidentning “Xizmatlar sohasini jadal rivojlantirish chora-tadbirlari to‘g‘risida”gi qarori bilan 2021-yil 1-sentabrga qadar O‘zbekistonning yirik shaharlari, viloyat va tuman markazlarida savdo va ko‘ngilochar ko‘chalar tashkil etilishi haqida xabar berilgan edi.
Izoh (0)