Frenk Statti ismli fuqaro o‘zining Nissan Altima mashinasidagi orqani ko‘rishga mo‘ljallangan kamerasi ta’mirlash uchun Kanadadagi dilerga bergan, biroq u sedan servis stansiyasidan 90 kilometr narida yurganini payqab qolgan, deb yozadi Motor.
Ma’lum qilinishicha, Kanadaning Milton shahrida istiqomat qiluvchi Nissan Altima sedanining egasi orqani ko‘rishga mo‘ljallangan kamera to‘satdan ishlamay qolgach, rasmiy dilerga murojaat qilishga majbur bo‘lgan. Servisdagilar mashinani ikki kunga tashlab ketishni so‘ragan. Bundan oldinroq sedan egasining sug‘urta kompaniyasi mashinani boshqarish uslubini tahlil qiladigan maxsus qurilmani o‘rnatishni maslahat bergan — bu orqali sug‘urta polisining qiymati hisoblanadi.
Mazkur gadjet, shuningdek, mobil dastur yordamida real vaqt rejimida avtomobilning qayerda ekanligini ko‘rsata oladi. Oradan ikki kun o‘tgach, kanadalikka hech kim qo‘ng‘iroq qilmagach, u dasturga qaragan va Altima’si qayerda ekanligini ko‘rib, hayratga tushgan.
Ta’kidlanishicha, mashina dilerda bo‘lmagan — u servis stansiyasidan 90 kilometr uzoqlikda, boshqa shaharda harakatlangan. Statti Nissan’ini o‘g‘irlab ketishdi deb o‘ylab, politsiyaga qo‘ng‘iroq qilgan. Biroq aniqlanishicha, uning mashinasida diler xodimi harakatlangan. Buning ustiga u mashinani yo‘l harakati qoidalarida rioya qilmagan holda boshqargan: dasturda soatiga 148 kilometr tezlik qayd etilgan. Dilerlik markazining boshqaruv sherigi o‘z xodimini noqonuniy kuzatishda ayblab, politsiyaga murojaat qilish bilan tahdid qilgan. Uning qo‘shimcha qilishicha, sedanda nosozlikni diagnostika qilish maqsadida harakatlanilgan. Kamerani tuzatishning esa imkoni bo‘lmagan.
Avvalroq Italiyada Fiat’ni o‘g‘irlagan shaxslar uning egasi kasalligidan xabar topib, mashinani qaytarib bergani ma’lum bo‘lgandi.
Izoh (0)