Fransiyaning giperkarlar ishlab chiqarish bilan shug‘ullanuvchi Bugatti brendi Ispaniyaning IXO Carbon kompaniyasi bilan birgalikda uglerod tola va alyuminiydan ishlangan bilyard stolini taqdim etdi, deb xabar beradi Motor.
Bugatti giperkarlar ishlab chiqaruvchisi hamda uglerod toladan detallar tayyorlashga ixtisoslashgan IXO Carbon kompaniyasi yuqori texnologik va ultrazamonaviy bilyard stolini yaratdi. Uning karkasi alyuminiydan ishlangan bo‘lib, yon qismiga kompyuter boshqaruv tizimi o‘rnatilgan va ko‘zgu kabi silliqlangan.
Shundan so‘ng rom polivinilxloridli uglerod tola bilan qoplangan. Bilyard stolining muhim jihati — kuzatuvchi uzatma orqali avtomatik to‘g‘rilash tizimi. Agarda stol yaxta bortiga o‘rnatilsa, uning har bir oyog‘i kemaning chayqalishini qoplashi mumkin.
IXO Carbon’ning ma’lum qilishicha, stolning har bir tayanchi Siemens tomonidan ishlab chiqarilgan yordamchi uzatma bilan jihozlangan bo‘lib, besh millisoniya ichida yaxtaning harakatiga javob qaytaradi. Biroq bu kabi texnologiya uchun katta mablag‘ to‘lashga to‘g‘ri keladi: stol narxi 300 ming dollarni tashkil etadi. Ushbu qiymatga o‘yin uchun barcha zaruriy aksessuarlar ham kiritilgan. Bugatti va IXO Carbon bilyard stoli jami 30 nusxada yaratilgan.
Avvalroq Rolls-Royce egalari uchun maxsus bilyard stoli yaratilgani to‘g‘risida xabar berilgandi.
Izoh (0)