Фрэнк Статти исмли фуқаро ўзининг Nissan Altima машинасидаги орқани кўришга мўлжалланган камераси таъмирлаш учун Канададаги дилерга берган, бироқ у седан сервис станциясидан 90 километр нарида юрганини пайқаб қолган, деб ёзади Motor.
Маълум қилинишича, Канаданинг Милтон шаҳрида истиқомат қилувчи Nissan Altima седанининг эгаси орқани кўришга мўлжалланган камера тўсатдан ишламай қолгач, расмий дилерга мурожаат қилишга мажбур бўлган. Сервисдагилар машинани икки кунга ташлаб кетишни сўраган. Бундан олдинроқ седан эгасининг суғурта компанияси машинани бошқариш услубини таҳлил қиладиган махсус қурилмани ўрнатишни маслаҳат берган — бу орқали суғурта полисининг қиймати ҳисобланади.
Мазкур гаджет, шунингдек, мобил дастур ёрдамида реал вақт режимида автомобилнинг қаерда эканлигини кўрсата олади. Орадан икки кун ўтгач, канадаликка ҳеч ким қўнғироқ қилмагач, у дастурга қараган ва Altima’си қаерда эканлигини кўриб, ҳайратга тушган.
Таъкидланишича, машина дилерда бўлмаган — у сервис станциясидан 90 километр узоқликда, бошқа шаҳарда ҳаракатланган. Статти Nissan’ини ўғирлаб кетишди деб ўйлаб, полицияга қўнғироқ қилган. Бироқ аниқланишича, унинг машинасида дилер ходими ҳаракатланган. Бунинг устига у машинани йўл ҳаракати қоидаларида риоя қилмаган ҳолда бошқарган: дастурда соатига 148 километр тезлик қайд этилган. Дилерлик марказининг бошқарув шериги ўз ходимини ноқонуний кузатишда айблаб, полицияга мурожаат қилиш билан таҳдид қилган. Унинг қўшимча қилишича, седанда носозликни диагностика қилиш мақсадида ҳаракатланилган. Камерани тузатишнинг эса имкони бўлмаган.
Аввалроқ Италияда Fiat’ни ўғирлаган шахслар унинг эгаси касаллигидан хабар топиб, машинани қайтариб бергани маълум бўлганди.
Изоҳ (0)