Ushbu yoz mavsumida tavsiya qilinmaydigan, urfdan qolgan 5 xil sumka

Moda dunyosi xatolarga nisbatan shafqatsizdir: noto‘g‘ri tanlangan bitta detal ham eng chiroyli obrazni buzishi mumkin. Barcha harakatlaringizni chipakka chiqaradigan eng nozik aksessuar — bu sumkadir.

Qora va jigarrang sumkalar

Albatta, asosiy rangda bo‘lgan hamda yuqori sifatli teridan tikilgan klassik sumka shkafingizda ortiqchalik qilmaydi. Biroq bu mavsumda qora va jigarrangni unutish kerak. Jasoratli bo‘ling va yorqin ranglardagi sumka sotib oling: pushti, ko‘k, och yashil, yashil, to‘q sariq ranglaridan.

Poyabzal rangidagi sumkalar

Oyoq va qo‘llardagi lak, shuningdek poyabzal rangiga moslab sumka taqadigan kunlar allaqachon o‘tdi. Hozirda dizaynerlar to‘liq erkinlik tarafdori, shuning uchun mos kelmaydigan rangdagi aksessuarlarni ham bemalol uyg‘unlashtirishingiz mumkin.

Plastik sumkalar

Shaffof plastik sumkalar atrofidagi shov-shuv esingizdami? Endi sumkangiz ichida nima borligini butun dunyoga ko‘rsatish shart emas. Hozirda Balenciaga moda uyi tomonidan yaratilgan Arena Tote sumkasi juda mashhur bo‘lib ketdi. Bu sumka yordamida eng ekstravagant bashang ayol unvoniga ega bo‘lasiz.

Soxta sumkalar

Dizaynerlar modani bor kuchlari bilan targ‘ib qilishadi, shuning uchun butun dunyoga mashhur brendlarga bo‘lgan muhabbatingizni izhor qilishingiz mumkin. Buning uchun esa narsalar asl bo‘lishi kerak. Yaltiroq logotipli soxta sumkalar yomon didga ishora qiladi. Xitoyda ishlab chiqarilgan qalbaki sumkalardan ko‘ra sifatli materialdan tayyorlangan nomsiz sumka sotib olgan yaxshiroqdir.

Katta hajmli sumkalar

Umuman olganda, kosmetika, yoga gilamchasi va sevimli kitobingizni sig‘diradigan sumkangiz bo‘lishi juda qulay. Ammo dizaynerlar ushbu mavsumda mikrosumkalarni tavsiya qilmoqda. Juda kichik hajmga ega bo‘lgan bunday sumkalarga faqat telefoningizni, lab bo‘yog‘ingizni va kredit kartangizni solishingiz mumkin. Agar modaning eng yuqori cho‘qqisida bo‘lishni istasangiz, meva, konserva bankasi yoki tabletka qutisi shaklidagi sumkani tanlang.