Dunyoga mashhur Nike brendi Sony kompaniyasining PlayStation 5 o‘yin konsolidan ilhomlanilgan krossovkalarni taqdim etdi, deb xabar beradi “Afisha.uz”.
PG 5 nomini olgan krossovkalarga Toni Xardman mualliflik qilgan. U PlayStation 5 dizayneri Yujin Morisava bilan birgalikda ishlab, konsolga xos elementlarni oyoq kiyimga tushirgan.
Yangi oyoq kiyimning asosiy rangi oq, qora va yorqin ko‘k ranglar unga qo‘shimcha ko‘rk bag‘ishlaydi. Krossovkaning “tili”ga PlayStation va Pol Jorj lineykasi logotiplari tushirilgan. Poshna qismini yaratishda Air Strobel innovatsion amortizatsiya texnologiyasidan foydalanilgan.
PlayStation x Nike PG 5 savdolari 14-maydan 120 dollar qiymatida boshlanadi.
Avvalroq Yaponiyaning The World Is Yours brendi sharqona naqshlar tushirilgan krossovkalarini taqdim etgani, reper Tommi Kesh va Adidas Originals uzunligi 1 metrni tashkil qiladigan krossovka yaratgani, Yaponiyada pedikyur qilingan oyoq ko‘rinishidagi botinkalar ishlab chiqarilgani haqida xabar berilgandi.
Izoh (0)