Bugungi kunda Prezident, ijod va ixtisoslashtirilgan maktablarni rivojlantirish agentligi tasarrufida 16 ta maktab ta’lim jarayonini olib bormoqda. Ulardan 4 tasi Prezident maktabi, 9 tasi ijod maktabi, 3 tasi ixtisoslashtirilgan maktablardir. Bu haqda 11-may, seshanba kuni AOKAda o‘tkazilgan matbuot anjumanida so‘z bordi, deya xabar bermoqda “Daryo” muxbiri.
Prezident, ijod va ixtisoslashtirilgan maktablarni rivojlantirish agentligi direktori Hilola Umarovaning qayd etishicha, 2021-yil oxirigacha yana o‘nta yangi Prezident maktabi o‘z faoliyatini boshlaydi.
“Ayni paytda Toshkent, Namangan, Xiva va Nukus shaharlarida Prezident maktablari faoliyat yuritayotgan bo‘lsa, hozirda Buxoro, Farg‘ona, Jizzax, Samarqand, Qarshi, Qashqadaryo, Andijon, Guliston, Navoiy, Termiz, Nurafshon shaharlarida yangi Prezident maktablari ochilishiga tayyorgarlik ko‘ryapmiz.
Hozirda Buxoro, Farg‘ona, Jizzax, Samarqand, Qarshi shahridagi maktablarimiz 98 foiz tayyor. Ya’ni sentabrga tayyor bo‘ladi. Andijon, Guliston, Navoiy, Termiz, Nurafshon shahridagi maktablarimizda qurilish ishlari boshlangan, ayni paytda 30-40 foiz ish bajarilgan. Lekin bu yil qabulga kechikish bilan tayyor bo‘lishi mumkin, balki 1 oyga kechikishi mumkin. Hozir shu zaxira bilan rejalashtiryapmiz. Lekin bu yilga 10 ta hududda 10 ta maktabni ochishni rejalashtirganmiz. O‘zimiz har hafta qurilish ishlarini nazorat qilib turibmiz.
Shuni alohida ta’kidlash kerakki, yangi tashkil etiladigan maktablarning 1-o‘quv yilida 5–10-sinflar kesimida jami 144 nafar o‘quvchi saralab olinadi”, — dedi Umarova.
Mavzuga doir:
- Prezident maktablaridagi o‘quvchilarning aksariyati vazir va hokimlarning farzandimi? Mutasaddilar javob berdi
- O‘zbekistonda Prezident maktablariga 2021/2022-o‘quv yilida 1632 nafar o‘quvchi qabul qilinadi
- Prezident maktablari bitiruvchilari xorij OTMlaridan jami 3,3 mln dollarlik grant takliflarini olgan
Izoh (0)