Toshkentda 10-may kuni bosh vazir o‘rinbosari — investitsiyalar va tashqi savdo vaziri Sardor Umurzoqov hamda Fransiya tashqi savdo va iqtisodiy jozibadorlik masalalari bo‘yicha vaziri Frank Riyester raisligida savdo-iqtisodiy hamkorlik bo‘yicha O‘zbekiston—Fransiya hukumatlararo komissiyasining 8-yig‘ilishi bo‘lib o‘tdi.
Investitsiyalar va tashqi savdo vazirligi matbuot xizmatining xabar berishicha, unda Fransiya idoralari, yirik kompaniya va banklarining 50 dan ortiq vakillari, shuningdek, O‘zbekiston tomonidan tegishli vazirlik, idora, tarmoq birlashmalari va tijorat banklari rahbarlari ishtirok etdi.
Tadbir kun tartibi bilan sanoat, energetika, qishloq xo‘jaligi, uy-joy kommunal xo‘jaligi, turizm, transport va boshqa sohalarda savdo-iqtisodiy va investitsiyaviy hamkorlik masalalarini qamrab olindi.
Yig‘ilishning asosiy mavzusi investitsiyaviy hamkorlikni yanada kengaytirish chora-tadbirlari bo‘ldi. Bugungi kunda O‘zbekistonda qurilish,turizm, qishloq xo‘jaligi va xizmat ko‘rsatish sohalarida Fransiya kapitali ishtirokidagi 44 ta korxona faoliyat yuritmoqda. Airbus, Total Eren, Eiffage, Thales, Vinci, Rungis, Orano, Suez, Leroy Merlin, Sanofi, Fives kabi yirik fransuz kompaniyalari hamda Natixis, Credit Agricole va Bpifrance banklari bilan loyihalarni amalga oshirishda erishilgan natijalar ta’kidlandi.
Tomonlarning qayd etishicha, muqobil energetika, geologiya-qidiruv, infratuzilmani rivojlantirish, qishloq xo‘jaligi, transport va logistika, turizm, bank-moliya sohalarida investitsiyaviy hamkorlikni chuqurlashtirish borasida ham salmoqli salohiyat mavjud. Fransiya kompaniyalarini O‘zbekistonda davlat aktivlarini xususiylashtirish dasturida ishtirok etish uchun jalb qilish imkoniyatlari alohida tartibda muhokama qilingan.
Uchrashuvda tomonlar o‘zaro savdoda mavjud to‘siqlarni bartaraf etish bo‘yicha qo‘shma amaliy chora-tadbirlarni amalga oshirish maqsadida ikki mamlakatning tegishli vazirlik va idoralari o‘rtasida yaqin hamkorlikni yo‘lga qo‘yish hamda savdo aylanmasini oshirish ishlarini davom ettirishga kelishib olindi. Shuningdek, O‘zbekiston iqtisodiyotining turli tarmoqlarida yangi istiqbolli loyihalarni hayotga tatbiq etish doirasida Fransiyaning to‘g‘ridan to‘g‘ri investitsiya va texnologiyalarini jalb etish borasida navbatdagi tadbirlar belgilab olindi.
Yig‘ilish yakunlari bo‘yicha O‘zbekiston Investitsiyalar va tashqi savdo vazirligi hamda Fransiya Tashqi savdo va iqtisodiy jozibadorlik vazirligi o‘rtasida 2021—2030-yillarga mo‘ljallangan ikki tomonlama iqtisodiy hamkorlik uchun “yo‘l xaritasi” imzolandi.
Shuningdek, “Bildirsoy-Chimyon-Nanay” xalqaro umummavsumiy kurortini yaratish loyihasini moliyalashtirish bo‘yicha moliyaviy bayonnoma ham imzolandi. “Gazeta.uz”ning eslatib o‘tishicha, kurortning konsepsiyasi va iqtisodiy modeli Fransiyaning Orex Loisirs, Compagnie des Alpes, Geode, Egis, Epode va Patriarche kompaniyalaridan iborat konsorsiumi tomonidan ishlab chiqilgan edi. Konsorsium ishchi guruhi hududni dastlabki o‘rganish ishlarini 2018-yilda boshlagandi. Loyihaning umumiy qiymati 480 million dollarni tashkil etadi, shundan 280 million dollarini to‘g‘ridan to‘g‘ri investitsiyalar.
Loyiha doirasida turistik infratuzilmani rivojlantirish, shu jumladan osma ko‘priklar va chang‘i yo‘llarini qurish rejalashtirilgan. Kelgusida sayyohlik zonasi hududida echki, tuya va asalarichilikni rivojlantirish asosida qo‘shimcha xizmat turlari tashkil etiladi.
Bundan tashqari, Suez kompaniyasi tomonidan amalga oshirilayotgan Toshkent shahrida suv ta’minoti tizimini modernizatsiya qilish va boshqarish loyihasini moliyalashtirish to‘g‘risida moliyaviy bayonnoma imzolandi. Avval xabar berilganidek, loyihaning umumiy budjeti 185,4 million yevroni tashkil qiladi. Mablag‘lar shahar suv ta’minoti va oqava suv tarmoqlarini modernizatsiya qilish va ularning boshqaruvini eng yuqori xalqaro standartlarga muvofiq takomillashtirishga yo‘naltiriladi.
Total Eren kompaniyasi tomonidan Samarqand viloyatida 100 megavatt quvvatga ega quyosh elektr stansiyasini qurish bo‘yicha moliyaviy bitim imzolandi. Yevropa tiklanish va taraqqiyot banki, Yevropa investitsiya banki va Proparco Fransiya taraqqiyot agentligi bo‘linmasi bilan birgalikda amalga oshiriladigan moliyalashtirish paketi umumiy hisobda 87,4 million yevro kreditni o‘z ichiga olgan.
Fransiya taraqqiyot agentligi bilan 2021—2025-yillarga mo‘ljallangan hamkorlik dasturi imzolandi. Avval xabar berilganidek, agentlik ushbu davrda O‘zbekistonda suv ta’minoti va kanalizatsiya, energetika, qishloq xo‘jaligi va atrof-muhitni muhofaza qilish sohasidagi loyihalarni amalga oshirish uchun 1 milliard yevro jalb qilmoqchi.
Avvalroq O‘zbekiston va Fransiya Tashqi ishlar vazirliklari o‘rtasida 2021—2022-yillarga mo‘ljallangan hamkorlik dasturini imzolagani haqida xabar berilgan edi.
Izoh (0)