Bugungi kunda Toshkent, Namangan, Xiva va Nukus shaharlaridagi Prezident maktablarida 569 nafar o‘quvchi bilim olmoqda. Bu haqda 11-may, seshanba kuni Prezident, ijod va ixtisoslashtirilgan maktablarni rivojlantirish agentligi rahbariyati ishtirokida AOKAda o‘tkazilgan matbuot anjumanida so‘z yuritildi.
Tadbirda qatnashgan “Daryo” muxbiri Mirolim Isajonov “Ijtimoiy tarmoqlarda Prezident maktablarida, asosan, vazir va hokimlarning farzandlari o‘qiydi, mazmundagi postlar va muhokamalarga tez-tez ko‘zimiz tushadi. Ko‘plab fuqarolarda ham shunday qarash shakllangan. Prezident maktablaridagi o‘g‘il-qizlarning qanchasi amaldorlarning farzandi, bu borada statistika yuritiladimi?”, degan savol bilan agentlik vakillariga yuzlandi.
“Toshkent shahridagi Prezident maktabi o‘quvchilarining aksariyati Sergeli tumanidagi 300-maktab bitiruvchilariga to‘g‘ri keladi. Ularning oilaviy kelib chiqishi haqida gapiradigan bo‘lsak, ota-onalarning hech biri vazir yoki hokim emas. Barchasi turli sohalarda faoliyat yuritsa-da, ammo mansabdor hisoblanmaydi. Bu esa kirish imtihonlari juda ham shaffof o‘tkazilganligini anglatadi”, — dedi agentlik direktori o‘rinbosari Amirulla Abdullayev.
Agentlik direktori Hilola Umarovaning ta’kidlashicha, o‘quvchilar orasida sharoiti og‘ir oila farzandlari ham bor.
“Savolingizga kelsak, bu bo‘yicha statistika qilganmiz. Maktablardagi o‘quvchilarning aksariyati — 70 foizining ota-onalari pedagogika sohasida ishlaydi, ya’ni o‘qituvchi. Misol uchun, Xiva shahridagi Prezident maktabi o‘quvchisi olimpiadada birinchi o‘rinni qo‘lga kiritib, otasiga avtomashina sovg‘a qildi. Dadasi matematika fani o‘qituvchisi, onasi uy bekasi. Shundan ko‘rish mumkinki, Prezident maktablaridagi o‘quvchilarning 70 foizi ustozlarning farzandlari, desam adashmayman. Bundan tashqari, maktablarimizda qiynalgan oila farzandlari ham tahsil oladi”, — dedi Umarova.
Mavzuga doir:
Izoh (0)