Президент матбуот котиби Шерзод Асадов 10 май, душанба куни ўтказилган брифингда жорий ҳафтадаги давлат раҳбари қатнашадиган муҳим тадбирлар ҳақида сўз юритди, дея хабар бермоқда «Дарё» мухбири.
«Бугун давлат хизматлари кўрсатиш соҳасидаги ислоҳотлар натижадорлиги ва келгусидаги устувор вазифалар юзасидан тақдимот бўлиб ўтади.
Шунингдек, ҳафта давомида соғлиқни сақлаш соҳасида рақамлаштириш жараёнлари ҳамда давлат-хусусий шериклик асосида амалга оширилаётган лойиҳалар тақдимоти, ҳудудлар ва тармоқларда иқтисодий ўсиш суръатларини таъминлаш масалалари бўйича видеоселектор ўтказилиши мўлжалланган», — деди Асадов.
Унинг қайд этишича, халқаро тадбирлар режасига кўра, ҳафта мобайнида Шавкат Мирзиёев Япония етакчиси ҳамда минтақадаги мамлакатлар раҳбарлари билан мулоқот ўтказади.
«Мана, муборак Рамазон ойи тугашига ҳам оз вақт қолди. Шу кунларда Президентга Рамазон ҳайитини нишонлаш тўғрисидаги қарор лойиҳаси бўйича ахборот берилади. Қабул қилинадиган қарор оммавий ахборот воситаларида эълон қилинади», — деди давлат раҳбари матбуот котиби.
Изоҳ (0)