Toshkent jamoat transporti tizimi bugungi kunda 30 foiz zararga ishlashga majbur bo‘lmoqda, xarajatlarning ma’lum qismi davlat dotatsiyasi hisobiga qoplanmoqda. Bu haqda Toshkent shahar Transport boshqarmasi boshlig‘i Anvar Jo‘rayev ma’lum qildi, deb yozmoqda “Xabar.uz”.
“Shaharda yo‘lkira narxi so‘nggi bor 2019-yil 1200 so‘mdan 1400 so‘mga ko‘tarilgan (16 foizga oshdi). Shu vaqt ichida esa yoqilg‘i va boshqa ehtiyot qismlar naxi esa bir necha barobar oshdi. Zarar ko‘rish, asosan, avtobus va metropolitenga tegishli. Yo‘nalishli taksilar esa yo‘lkira haqini mustaqil belgilaydi. Ularda zarar yo‘q”, — degan u 7-may kuni jurnalistlar uchun Toshkent metrosiga uyushtirilgan press-turda.
Press-tur davomida transport sohasi mutasaddilari jamoat transporti to‘lovi narxi oshishi masalasiga ham izoh berib o‘tgan. Transport boshqarmasi ma’lumotiga ko‘ra, yaqin orada joriy to‘lov (1400 so‘m)ni o‘zgartirish masalasi kutilmayapti. Mazkur to‘lov miqdori so‘nggi marta 2019-yil 15-avgust kuni o‘zgargandi.
Shuningdek, transport vaziri Ilhom Mahkamov o‘z chiqishlaridan birida yo‘lovchilar yurgan bekati soni ko‘pligidan kelib chiqib pul to‘lashi amaliyoti yo‘lga qo‘yilishi mumkinligi haqida gapirgandi. Vazirlik rasmiysi izohiga ko‘ra, mazkur masala bo‘yicha 3 oy sinov o‘tkazish ko‘zda tutilgan. Unda yo‘lovchilarning o‘rtacha yo‘l bosish masofasi o‘rganiladi. Shunga qarab tabaqalashtirilgan to‘lov tizimi yaratiladi. O‘rganish ishlari 2021-yil iyun oyidan boshlanadi.
Izoh (0)