Surxondaryo viloyati Boysun tumanida ichimlik suvi tarmog‘iga noqonuniy ulanib, suv sarfiga sabab bo‘layotgan holatlar aniqlandi. Bu haqda “O‘zsuvta’minot” matbuot xizmati xabar berdi.
Dastlabki o‘rganish natijalariga ko‘ra, Xo‘jamayxona magistral suv quvurida 30 ta noqonuniy ulanish holati aniqlangan. Shuningdek, Boysun tuman yo‘l qurilishi bo‘limi magistral quvurga texnik shartlarsiz va shartnoma tuzmay, yashirincha quvur tortib olgani aniqlangan. Natijada 20 million 576 ming so‘mga dalolatnoma tuzilib, inspeksiya tomonidan mansabdor shaxslar jarimaga tortilgan.
Qayd etilishicha, bunday noqonuniy holatlar “Bibishirin”, “Shirinobod” kabi boshqa mahallalarda ham aniqlanib, tarmoqdan uzish ishlari olib borilmoqda. Barcha holatlar yuzasidan tegishli hujjatlar rasmiylashtirilib, prokuratura va ichki ishlar organlariga taqdim qilinadi, deyiladi xabarda.
Izoh (0)