Тошкент жамоат транспорти тизими бугунги кунда 30 фоиз зарарга ишлашга мажбур бўлмоқда, харажатларнинг маълум қисми давлат дотацияси ҳисобига қопланмоқда. Бу ҳақда Тошкент шаҳар Транспорт бошқармаси бошлиғи Анвар Жўраев маълум қилди, деб ёзмоқда «Xabar.uz».
«Шаҳарда йўлкира нархи сўнгги бор 2019 йил 1200 сўмдан 1400 сўмга кўтарилган (16 фоизга ошди). Шу вақт ичида эса ёқилғи ва бошқа эҳтиёт қисмлар нахи эса бир неча баробар ошди. Зарар кўриш, асосан, автобус ва метрополитенга тегишли. Йўналишли таксилар эса йўлкира ҳақини мустақил белгилайди. Уларда зарар йўқ», — деган у 7 май куни журналистлар учун Тошкент метросига уюштирилган пресс-турда.
Пресс-тур давомида транспорт соҳаси мутасаддилари жамоат транспорти тўлови нархи ошиши масаласига ҳам изоҳ бериб ўтган. Транспорт бошқармаси маълумотига кўра, яқин орада жорий тўлов (1400 сўм)ни ўзгартириш масаласи кутилмаяпти. Мазкур тўлов миқдори сўнгги марта 2019 йил 15 август куни ўзгарганди.
Шунингдек, транспорт вазири Илҳом Маҳкамов ўз чиқишларидан бирида йўловчилар юрган бекати сони кўплигидан келиб чиқиб пул тўлаши амалиёти йўлга қўйилиши мумкинлиги ҳақида гапирганди. Вазирлик расмийси изоҳига кўра, мазкур масала бўйича 3 ой синов ўтказиш кўзда тутилган. Унда йўловчиларнинг ўртача йўл босиш масофаси ўрганилади. Шунга қараб табақалаштирилган тўлов тизими яратилади. Ўрганиш ишлари 2021 йил июнь ойидан бошланади.
Изоҳ (0)