Qozog‘iston Sog‘liqni saqlash vazirligi Amerika Salomatlik ko‘rsatkichlari va baholari instituti (IHME) tadqiqotlarida e’lon qilingan respublikada koronavirus infeksiyasi qurbonlari soni qariyb 82 ming nafarni tashkil qilishi haqidagi ma’lumotlarni rad etdi, deb yozadi “Interfaks”.
Qozog‘iston SSV xabarida aytilishicha, pandemiya boshidan buyon mamlakatda COVID-19 oqibatida 6575 kishi vafot etgan.
Milliy statistika byurosi ma’lumotlariga ko‘ra, 2020-yil yakunlari bo‘yicha Qozog‘istonda koronavirusdan vafot etganlar soni 4729 kishini, 2021-yilning to‘rt oyi bo‘yicha esa 1846 kishini tashkil qiladi.
Ta’kidlanishicha, Milliy statistika byurosining dastlabki ma’lumotlariga ko‘ra, 2020-yilda vafot etganlar soni 2019-yilga nisbatan 21,8 foizga (29 124 kishi) oshgan va 162 613 kishini tashkil etgan (2019-yilda — 133 489 kishi). Shu tariqa, ortiqcha o‘limlar soni 29 124 kishiga teng bo‘lgan — bu ham IHME keltirib o‘tgan raqamlarni inkor qiladi.
“Ortiqcha o‘lim tarkibidagi COVID-19’dan (4729 kishi — 16,2 foiz) tashqari asosiy qismni qon aylanish tizimi, nafas olish organlari, asab tizimi kasalliklari, yuqumli va parazitar kasalliklar tufayli yuz bergan o‘limlar tashkil etdi”, — deyiladi xabarda.
Qozog‘iston SSVning 6,5 ming nafar koronavirus qurbonlari haqidagi ma’lumotlari muassasa har kuni e’lon qilib boradigan ma’lumotlardagi qurbonlar sonidan ziyodroqdir.
Chunonchi, vazirlikning 9-may kuni e’lon qilingan ma’lumotlariga ko‘ra, 2020-yil 13-martdan 2021-yil 8-maygacha Qozog‘istonda PZR-testi musbat chiqqan 3913 kishi, 2020-yil 1-avgustdan 2021-yil 7-maygacha PZR-testi manfiy chiqqan 831 kishi koronavirusdan vafot etgan. 2020-yil avgustgacha Qozog‘istonda COVID-19 qurbonlari statistikasida PZR-testi musbat chiqmagan va koronavirusli pnevmoniyadan vafot etganlar hisobga olinmagan.
Izoh (0)