Қозоғистон Соғлиқни сақлаш вазирлиги Америка Саломатлик кўрсаткичлари ва баҳолари институти (IHME) тадқиқотларида эълон қилинган республикада коронавирус инфекцияси қурбонлари сони қарийб 82 минг нафарни ташкил қилиши ҳақидаги маълумотларни рад этди, деб ёзади «Интерфакс».
Қозоғистон ССВ хабарида айтилишича, пандемия бошидан буён мамлакатда COVID-19 оқибатида 6575 киши вафот этган.
Миллий статистика бюроси маълумотларига кўра, 2020 йил якунлари бўйича Қозоғистонда коронавирусдан вафот этганлар сони 4729 кишини, 2021 йилнинг тўрт ойи бўйича эса 1846 кишини ташкил қилади.
Таъкидланишича, Миллий статистика бюросининг дастлабки маълумотларига кўра, 2020 йилда вафот этганлар сони 2019 йилга нисбатан 21,8 фоизга (29 124 киши) ошган ва 162 613 кишини ташкил этган (2019 йилда — 133 489 киши). Шу тариқа, ортиқча ўлимлар сони 29 124 кишига тенг бўлган — бу ҳам IHME келтириб ўтган рақамларни инкор қилади.
«Ортиқча ўлим таркибидаги COVID-19’дан (4729 киши — 16,2 фоиз) ташқари асосий қисмни қон айланиш тизими, нафас олиш органлари, асаб тизими касалликлари, юқумли ва паразитар касалликлар туфайли юз берган ўлимлар ташкил этди», — дейилади хабарда.
Қозоғистон ССВнинг 6,5 минг нафар коронавирус қурбонлари ҳақидаги маълумотлари муассаса ҳар куни эълон қилиб борадиган маълумотлардаги қурбонлар сонидан зиёдроқдир.
Чунончи, вазирликнинг 9 май куни эълон қилинган маълумотларига кўра, 2020 йил 13 мартдан 2021 йил 8 майгача Қозоғистонда ПЗР-тести мусбат чиққан 3913 киши, 2020 йил 1 августдан 2021 йил 7 майгача ПЗР-тести манфий чиққан 831 киши коронавирусдан вафот этган. 2020 йил августгача Қозоғистонда COVID-19 қурбонлари статистикасида ПЗР-тести мусбат чиқмаган ва коронавирусли пневмониядан вафот этганлар ҳисобга олинмаган.
Изоҳ (0)