Putin: Rossiya hukumati mamlakatni muhojirlar uchun qulay qilishga intilmoqda

Rossiya hukumati boshqa mamlakatlardan kelgan mehnat muhojirlarining hayotini yengillashtirish uchun bor kuchini ishga solmoqda. Bu haqda Rossiya prezidenti Vladimir Putin 8-may kuni Tojikiston prezidenti Emomali Rahmon bilan uchrashuvda aytib o‘tdi, deb yozadi “RBK”.

“Odamlar o‘zlarini qulay his qilishi uchun biz barcha narsani qilyapmiz, ustiga-ustak bizda hozir iqtisodiyotning butun boshli tarmoqlarida haqiqiy ishchi qo‘llar tanqisligi bor”, — dedi Putin.

Ayni vaqtda prezident muhojirlar masalasini Tojikiston uchun “nozik” deb atab, Rossiyada ishlayotgan ushbu mamlakat fuqarolari o‘z oilalariga “ancha katta miqdorda pul” yuborishini ta’kidladi.

“Bu mutlaqo ijobiy jarayon deb hisoblayman”, — dedi Putin.

Avvalroq Rossiya prezidenti matbuot kotibi Dmitriy Peskov Rossiyada COVID-19 pandemiyasi tufayli sezilarli darajada kamaygan mehnat muhojirlarining soni mamlakatdagi yirik loyihalarni amalga oshirish uchun yetarli emasligini aytgan edi.

Ammo keyinroq Rossiya ichki ishlar vaziri o‘rinbosari Aleksandr Gorovoy Rossiyada bir milliondan ortiq odam noqonuniy bo‘lib turganini ma’lum qildi. Vazir o‘rinbosari keltirgan Ichki ishlar vazirligining statistik ma’lumotlariga ko‘ra, bugungi kunda Rossiyada 332 mingdan ziyod O‘zbekiston fuqarosi, 247 ming Tojikiston fuqarosi, 152 ming Ukraina fuqarosi, 120 ming Ozarbayjon fuqarosi, 115 ming Qirg‘iziston fuqarosi, 61 ming Armaniston fuqarosi, 56 ming Moldova fuqarosi, 49 ming Qozog‘iston fuqarosi noqonuniy migrant hisoblanadi.

Rossiya Ichki ishlar vazirligi MDH davlatlaridan kelib, Rossiyada noqonuniy ravishda yurgan muhojirlarni 15-iyunga qadar mamlakatni tark etishlarini talab qilmoqda.