Belarus prezidenti u o‘ldirilgan taqdirda hokimiyatning topshirilishi haqidagi hujjatni imzoladi

Belarus prezidenti Aleksandr Lukashenko “Suverenitet va konstitutsiyaviy tuzum himoyasi to‘g‘risida”gi dekret (qonun kuchiga ega bo‘lgan qaror, farmoyish)ni imzoladi, deb yozadi Meduza.

“BelTA” ma’lum qilishicha, ushbu hujjat davlat rahbarining suiqasd, terrorchilik harakati, tashqi tajovuz va boshqa zo‘ravonlik harakatlari natijasidagi o‘limi yuz bergan taqdirda barcha davlat organlari va ularning mansabdor shaxslari Xavfsizlik kengashi (uning majlislarida bosh vazir raislik qiladi) qarorlariga muvofiq harakat qilishini ko‘zda tutadi.

Ayni vaqtda mamlakat hududida zudlik bilan favqulodda yoki harbiy holat e’lon qilinadi, Xavfsizlik kengashi tomonidan esa ularni ta’minlash bo‘yicha chora-tadbirlar belgilanadi.

Dekretga muvofiq, Xavfsizlik kengashi gubernatorlar bilan birgalikda yangi prezident saylovini o‘tkazish masalasini hal qilishi, uning sanasini belgilashi kerak. Hujjat imzolagan vaqtdan boshlab kuchga kiradi.

Belarusda favqulodda vaziyat yuz bergan taqdirda prezident vakolatlarining Xavfsizlik kengashiga o‘tishi haqidagi dekretning tayyorlanayotgani haqida Lukashenko aprel oyining oxirida, Rossiya Federal xavfsizlik xizmati (FXX) va Belarus Davlat xavfsizlik qo‘mitasi unga nisbatan suiqasdning oldi olingani haqida e’lon qilganidan keyin bir necha kun o‘tib ma’lum qilgan edi. O‘shanda Lukashenko hokimiyatning shoshilinch tarzda topshirilishi — shunchaki ehtiyot chorasi ekanini ta’kidlagan edi. “Bu men kimgadir nimanidir topshirmoqchi ekanimni anglatmaydi”, — degan edi u.

17-aprel kuni Lukashenko tez orada o‘zining “chorak asrlik prezidentligi davridagi asosiy qarorlaridan” birini e’lon qilishini ma’lum qilgan edi. U qanday qaror bo‘lishiga aniqlik kiritmagan.

Shu kuni Belarus Davlat xavfsizlik qo‘mitasi hokimiyatni egallashga urinish hamda Lukashenko va uning oila a’zolari hayotiga suiqasd qilishning oldi olingani to‘g‘risida xabar berdi. Moskvada FXX yordamida fitna ishtirokchisi deb gumon qilingan ikki kishi — Belarus siyosatshunosi Aleksandr Fedut va advokat Yuriy Zenkovich hibsga olingan. Lukashenkoning aytishicha, suiqasd ortida AQSh maxsus xizmatlari turgan.

AQSh Lukashenkoga nisbatan suiqasdga aloqasi borligini rad etdi.

21-aprel kuni Putin Federal Majlisga yillik murojaati chog‘ida G‘arb davlatlari Lukashenkoga qarshi suiqasdni payqamaganini va qoralamaganini ta’kidladi.