“Paxtakor” klubining SFI Management Group MChJga tegishli 80% aksiyasi Toshkent shahar hokimligi tasarrufiga qaytarildi, deya xabar qilmoqda Alisher Nikimbayev.
“Biroq bu “Paxtakor” shahar budjetidan kun ko‘radi degani emas. Katta ehtimol bilan klubga homiylar topiladi va klubning xarajatlari ularga yuklanadi”, — deydi Nikimbayev.
Ta’kidlanishicha, investor aksiyalarni qaytarish asnosida klubni mablag‘siz qoldirgan.
“Bu holat futbol klublarining aksiyasi bilan bog‘liq jihatlarni ko‘rib chiqishga sabab bo‘lishi kerak. SFI Management Group “Paxtakor”ning aksiyalarini qaytarish asnosida klubni deyarli pulsiz qoldirdi. Hatto Chempionlar Ligasidagi ishtirok uchun ham mablag‘ yetishmagan va rahbariyat kredit olishga majbur bo‘lgan. Tabiiyki, klubning moliyaviy beqaror holati Chempionlar Ligasidagi omadsizlikning sabablaridan biri bo‘lgan.
Keyingi safar aksioner o‘z ulushidan voz kechgan taqdirda, undan klubning hech bo‘lmaganda 6 oylik xarajatlarini qoplab berishni talab qilish o‘rinli bo‘ladi, ehtimol”, — deya qo‘shimcha qildi Nikimbayev.
Avvalroq “Paxtakor” Davlat aktivlarini boshqarish agentligi tomonidan O‘zbekistonda 2020-yilni eng ko‘p zarar bilan yakunlagan davlat korxonalari reytingiga kiritildi. Klub bunga nisbatan rasmiy bayonot bilan chiqib 2018—2020-yilgi xarajatlar to‘liq SFI tomonidan qoplanganini ma’lum qildi.
Eslatib o‘tamiz, “Paxtakor”ning 80 foiz ulushi 2017-yilda SFI Management Group MChJga berilgandi. Qolgan 20% aksiya esa Toshkent shahar hokimligida qolgandi.
2021-yilning fevral oyida “O‘zmetkombinat”, Olmaliq kon-metallurgiya kombinati va “O‘zikkilamchiranglimetall” korxonalari SFI Management Group ishonchli boshqaruvidan chiqarilgani xabar qilingandi.
SFI Management Group kimga tegishli?
2018-yil avgustida kompaniya O‘zbekistondagi loyihalarga Alisher Usmonov homiyligida jalb qilingani haqida xabar berilgandi. Keyinchalik tadbirkor SFI’ning egasi Fattoh Shodiev ekanligini rad etgan, ammo uning akasi va do‘stining oilasiga tegishli ekanligini bildirgan.
Ma’lumot uchun, SFI Management Group MChJ xorijiy korxonasi korxonalarni bozor munosabatlariga moslashtirish, xalqaro standartlarni joriy etish, xorijiy mutaxassislar va investitsiyalarni jalb qilishda faol ishtirok etish orqali O‘zbekistonning iqtisodiy rivojlanishiga hissa qo‘shish maqsadida tashkil etilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)