SFI Management Group «Пахтакор»даги улушидан воз кечди. Клуб тўлақонли Тошкент шаҳар ҳокимлиги тасарруфига ўтди

«Пахтакор» клубининг SFI Management Group МЧЖга тегишли 80% акцияси Тошкент шаҳар ҳокимлиги тасарруфига қайтарилди, дея хабар қилмоқда Алишер Никимбаев.

«Бироқ бу «Пахтакор» шаҳар бюджетидан кун кўради дегани эмас. Катта эҳтимол билан клубга ҳомийлар топилади ва клубнинг харажатлари уларга юкланади», — дейди Никимбаев.

Таъкидланишича, инвестор акцияларни қайтариш асносида клубни маблағсиз қолдирган.

«Бу ҳолат футбол клубларининг акцияси билан боғлиқ жиҳатларни кўриб чиқишга сабаб бўлиши керак. SFI Management Group «Пахтакор»нинг акцияларини қайтариш асносида клубни деярли пулсиз қолдирди. Ҳатто Чемпионлар Лигасидаги иштирок учун ҳам маблағ етишмаган ва раҳбарият кредит олишга мажбур бўлган. Табиийки, клубнинг молиявий беқарор ҳолати Чемпионлар Лигасидаги омадсизликнинг сабабларидан бири бўлган.

Кейинги сафар аксионер ўз улушидан воз кечган тақдирда, ундан клубнинг ҳеч бўлмаганда 6 ойлик харажатларини қоплаб беришни талаб қилиш ўринли бўлади, эҳтимол», — дея қўшимча қилди Никимбаев.

Аввалроқ «Пахтакор» Давлат активларини бошқариш агентлиги томонидан Ўзбекистонда 2020 йилни энг кўп зарар билан якунлаган давлат корхоналари рейтингига киритилди. Клуб бунга нисбатан расмий баёнот билан чиқиб 2018—2020 йилги харажатлар тўлиқ SFI томонидан қопланганини маълум қилди.

Эслатиб ўтамиз, «Пахтакор»нинг 80 фоиз улуши 2017 йилда SFI Management Group МЧЖга берилганди. Қолган 20% акция эса Тошкент шаҳар ҳокимлигида қолганди.

2021 йилнинг февраль ойида «Ўзметкомбинат», Олмалиқ кон-металлургия комбинати ва «Ўзиккиламчиранглиметалл» корхоналари SFI Management Group ишончли бошқарувидан чиқарилгани хабар қилинганди.

SFI Management Group кимга тегишли?

2018 йил августида компания Ўзбекистондаги лойиҳаларга Алишер Усмонов ҳомийлигида жалб қилингани ҳақида хабар берилганди. Кейинчалик тадбиркор SFI'нинг эгаси Фаттоҳ Шодиэв эканлигини рад этган, аммо унинг акаси ва дўстининг оиласига тегишли эканлигини билдирган.

Маълумот учун, SFI Management Group МЧЖ хорижий корхонаси корхоналарни бозор муносабатларига мослаштириш, халқаро стандартларни жорий этиш, хорижий мутахассислар ва инвестицияларни жалб қилишда фаол иштирок этиш орқали Ўзбекистоннинг иқтисодий ривожланишига ҳисса қўшиш мақсадида ташкил этилган.