Birlashgan Arab Amirliklari (BAA) va Saudiya Arabistonida atrofidagilarga qasddan koronavirus yuqtirganlik uchun 133 ming dollargacha miqdorda jarima va besh yilgacha qamoq jazosi joriy etildi. Bu haqda hukumatlarning vakolatli organlariga tayanib, “TASS” xabar berdi.
Saudiya Arabistoni tashqi ishlar vazirining ma’lumot berishicha, koronavirus pandemiyasi to‘g‘risida mish-mishlar va yolg‘on ma’lumotlar tarqatganlik uchun eng yirik miqdorda — 266 ming dollargacha jarima solinadi. Atrofidagilarga qasddan virus yuqtirganlar 133 ming dollargacha, BAAda esa 27 ming dollargacha jarima to‘laydi.
6-may holatiga ko‘ra, BAAda bir kun davomida koronavirus bilan kasallanish bo‘yicha 1,7 mingta yangi holat ro‘yxatga olindi. Pandemiya boshlanganidan buyon 530,9 mingdan ortiq kishi koronavirusga chalindi, 1,6 ming kishi uning qurboniga aylandi.
Saudiya Arabistonida esa mingta yangi holat qayd etildi. Pandemiya boshidan buyon koronavirus bilan kasallanganlar soni 423,4 mingdan oshdi, ularning yetti ming nafari vafot etdi.
2021-yilning 2-may kuni berilgan ma’lumotlarga ko‘ra, Saudiya Arabistoni 17-may soat 01:00 dan (Toshkent vaqti bilan 03:00) boshlab chegaralarini ochadi va fuqarolarining boshqa mamlakatlarga sayohat qilishi uchun o‘rnatilgan cheklovlarni bekor qiladi. Ma’lumot uchun, ushbu cheklovlar 2020-yilning 21-dekabr kuni joriy etilgan edi.
Avvalroq Saudiya Arabistoni Haj masalalari bo‘yicha vazirligi mamlakat hukumati Ramazon oyida COVID-19’ga qarshi emlangan ziyoratchilarga muqaddas qadamjolarga tashrif buyurish uchun ruxsat berishini ma’lum qilgandi.
Eslatib o‘tamiz, 2020-yil mart oyi o‘rtalarida Saudiya Arabistoni podshohligida jamoat namozlari vaqtincha to‘xtatilgan va faqat ikkita — Makka hamda Madinadagi masjidda jamoat bo‘lib namoz o‘qishga ruxsat berilgandi. Biroq keyinchalik koronavirus tarqalishi xavfi sabab Al-Harom va Nabaviy Masjidda ham namoz o‘qish to‘xtatilgan. 23-mart kuni mamlakatda komendantlik soati joriy etilgan, 24-mart kuni mamlakatda koronavirus bilan bog‘liq birinchi o‘lim holati qayd etilgan. Shuningdek, aholi hamda xorijlik ziyoratchilar uchun Umra ziyoratini amalga oshirish tadbirlari ham noma’lum muddatga qoldirilgandi.
2020-yil 7-aprelda Saudiya Arabistoni Ramazon oyida masjidlarni ochishni rejalashtirmayotgani aytilgan, 13-aprel kuni Ramazon oyida Saudiya Arabistonida tarovih namozlari uyda o‘qilishi haqida fatvo berilgani xabar qilingan, keyinchalik shu kuni O‘zbekiston musulmonlari idorasining Ramazon oyini o‘tkazish haqidagi bayonotida tarovih namozlarini uyda o‘qish tavsiya qilindi. Saudiya Arabistonida komendantlik soati 21-iyundan bekor qilingan, biroq shunga qaramay, ko‘plab cheklovlar o‘z kuchida qolgan.
Saudiya Arabistoni 2020-yil oktabr oyidan boshlab mamlakatda yashovchi aholisi uchun Umra ziyoratini amalga oshirishga ruxsat bergan edi. Va o‘sha oy o‘rtalarida mamlakat hukumati yetti oy ichida birinchi marta Makkadagi Al-Harom masjidida namoz o‘qilishiga ruxsat berdi.
Izoh (0)