Бирлашган Араб Амирликлари (БАА) ва Саудия Арабистонида атрофидагиларга қасддан коронавирус юқтирганлик учун 133 минг долларгача миқдорда жарима ва беш йилгача қамоқ жазоси жорий этилди. Бу ҳақда ҳукуматларнинг ваколатли органларига таяниб, «ТАСС» хабар берди.
Саудия Арабистони ташқи ишлар вазирининг маълумот беришича, коронавирус пандемияси тўғрисида миш-мишлар ва ёлғон маълумотлар тарқатганлик учун энг йирик миқдорда — 266 минг долларгача жарима солинади. Атрофидагиларга қасддан вирус юқтирганлар 133 минг долларгача, БААда эса 27 минг долларгача жарима тўлайди.
6 май ҳолатига кўра, БААда бир кун давомида коронавирус билан касалланиш бўйича 1,7 мингта янги ҳолат рўйхатга олинди. Пандемия бошланганидан буён 530,9 мингдан ортиқ киши коронавирусга чалинди, 1,6 минг киши унинг қурбонига айланди.
Саудия Арабистонида эса мингта янги ҳолат қайд этилди. Пандемия бошидан буён коронавирус билан касалланганлар сони 423,4 мингдан ошди, уларнинг етти минг нафари вафот этди.
2021 йилнинг 2 май куни берилган маълумотларга кўра, Саудия Арабистони 17 май соат 01:00 дан (Тошкент вақти билан 03:00) бошлаб чегараларини очади ва фуқароларининг бошқа мамлакатларга саёҳат қилиши учун ўрнатилган чекловларни бекор қилади. Маълумот учун, ушбу чекловлар 2020 йилнинг 21 декабрь куни жорий этилган эди.
Аввалроқ Саудия Арабистони Ҳаж масалалари бўйича вазирлиги мамлакат ҳукумати Рамазон ойида COVID-19’га қарши эмланган зиёратчиларга муқаддас қадамжоларга ташриф буюриш учун рухсат беришини маълум қилганди.
Эслатиб ўтамиз, 2020 йил март ойи ўрталарида Саудия Арабистони подшоҳлигида жамоат намозлари вақтинча тўхтатилган ва фақат иккита — Макка ҳамда Мадинадаги масжидда жамоат бўлиб намоз ўқишга рухсат берилганди. Бироқ кейинчалик коронавирус тарқалиши хавфи сабаб Ал-Ҳаром ва Набавий Масжидда ҳам намоз ўқиш тўхтатилган. 23 март куни мамлакатда комендантлик соати жорий этилган, 24 март куни мамлакатда коронавирус билан боғлиқ биринчи ўлим ҳолати қайд этилган. Шунингдек, аҳоли ҳамда хорижлик зиёратчилар учун Умра зиёратини амалга ошириш тадбирлари ҳам номаълум муддатга қолдирилганди.
2020 йил 7 апрелда Саудия Арабистони Рамазон ойида масжидларни очишни режалаштирмаётгани айтилган, 13 апрель куни Рамазон ойида Саудия Арабистонида таровиҳ намозлари уйда ўқилиши ҳақида фатво берилгани хабар қилинган, кейинчалик шу куни Ўзбекистон мусулмонлари идорасининг Рамазон ойини ўтказиш ҳақидаги баёнотида таровиҳ намозларини уйда ўқиш тавсия қилинди. Саудия Арабистонида комендантлик соати 21 июндан бекор қилинган, бироқ шунга қарамай, кўплаб чекловлар ўз кучида қолган.
Саудия Арабистони 2020 йил октябрь ойидан бошлаб мамлакатда яшовчи аҳолиси учун Умра зиёратини амалга оширишга рухсат берган эди. Ва ўша ой ўрталарида мамлакат ҳукумати етти ой ичида биринчи марта Маккадаги Ал-Ҳаром масжидида намоз ўқилишига рухсат берди.
Изоҳ (0)