Shavkat Mirziyoyev 5-may kuni “Sog‘liqni saqlash tizimida olib borilayotgan islohotlarni izchil davom ettirish va tibbiyot xodimlarining salohiyatini oshirish uchun zarur shart-sharoitlar yaratish to‘g‘risida”gi farmonni imzoladi. Hujjat bilan sog‘liqni saqlash tizimini yaxshilashga qaratilgan bir qator o‘zgarishlar amalga oshiriladi.
Oilaviy poliklinikalarda “tibbiyot brigadalari” faoliyati yo‘lga qo‘yiladi
Oilaviy shifokor punktlari va oilaviy poliklinikalarda “tibbiyot brigadalari” faoliyatini yo‘lga qo‘yish, shuningdek, tuman (shahar) ko‘p tarmoqli markaziy poliklinikalari tomonidan aholiga yanada sifatli tibbiy xizmatlar ko‘rsatish qamrovini kengaytirish uchun 2021-yil 1-iyuldan boshlab 10 mingta, 2022-yil 1-yanvardan boshlab esa yana qo‘shimcha 10 mingta o‘rta tibbiyot xodimlari shtati ajratiladi.
2021-yil 1-avgustga qadar o‘rta tibbiyot xodimlarini tayyorlash va ularning malakasini oshirish tizimi takomillashtiriladi va u 2021/2022-o‘quv yilidan boshlab to‘liq joriy qilinadi. Bunga Jahon sog‘liqni saqlash tashkiloti va yetakchi xorijiy ekspertlar jalb qilinadi.
Og‘ir sharoitli hududllardagi tibbiyot birlashmalari rahbarligiga malakali rahbar xodimlar va mutaxassislar jalb qilinadi
Ehtiyoj mavjud bo‘lgan og‘ir sharoitli tuman (shahar)lar tibbiyot birlashmalari rahbarlari lavozimlariga respublika ixtisoslashtirilgan tibbiyot markazlari, ularning filiallari, oliy tibbiyot ta’lim muassasalari, ular huzuridagi klinikalarning malakali rahbar xodimlari va mutaxassislari shartnoma asosida muayyan muddatga jalb qilinadi.
Ushbu rahbar xodimlar va mutaxassislarga asosiy ish joyidagi o‘rtacha oylik ish haqi miqdorini saqlagan holda, ular jalb qilingan tibbiyot birlashmasi rahbari lavozimidagi oylik ish haqi to‘liq to‘lab beriladi. Ushbu xarajatlar hamda ularning uy-joy ijarasi to‘lovlarini Qoraqalpog‘iston Respublikasi respublika budjeti va viloyatlar mahalliy budjetlari mablag‘lari hisobidan qoplab beriladi.
Tuman (shahar) shifoxonalarining dori vositalari, reaktivlar va tibbiyot uskunalari ta’minoti yaxshilanadi
Markaziy tuman (shahar) shifoxonalarining davlat budjetidan moliyalashtiriladigan amaldagi koykalar fondining 10 foizi 2022-yil 1-yanvardan boshlab, yana qo‘shimcha 10 foizi 2023-yil 1-yanvardan boshlab to‘lov asosida tibbiy xizmatlar ko‘rsatishdan tushadigan budjetdan tashqari mablag‘lar hisobiga ta’minlanadigan koykalar fondiga o‘tkaziladi.
Bundan bo‘shaydigan davlat byudjeti mablag‘lari tuman (shahar) shifoxonalarining dori vositalari, reaktivlar va tibbiyot uskunalari ta’minotini yaxshilashga hamda viloyat tibbiyot muassasalarida qo‘shimcha koyka fondini tashkil etishga yo‘naltiriladi.
Hamshiralik ishi o‘zini o‘zi band qiluvchi faoliyat turlari ro‘yxatiga kiritiladi
Hamshiralik ishi 2022-yil 1-yanvardan boshlab o‘zini o‘zi band qiluvchi faoliyat turlari ro‘yxatiga kiritiladi. Buning uchun ular o‘rta tibbiy yoki oliy hamshiralik ishi yo‘nalishi bo‘yicha oliy ma’lumotga ega bo‘lishi va Sog‘liqni saqlash vazirligining tegishli axborot tizimida ro‘yxatdan o‘tgan bo‘lishi lozim.
Nodavlat tibbiyot tashkilotlariga ayrim faoliyat turlari bilan shug‘ullanishga ruxsat beriladi
2021-yil 1-iyuldan boshlab nodavlat tibbiyot tashkilotlariga maxsus avtotransport vositasida tashkil etiladigan “mobil tibbiyot” xizmati yordamida joyiga chiqqan holda aholiga tibbiy xizmat ko‘rsatish, shuningdek, nodavlat tibbiyot tashkilotining o‘rta tibbiyot xodimlaridan iborat “tibbiy punkt”larini tashkil etishga ruxsat beriladi.
Bepul tibbiy yordam olish huquqini beruvchi order berish tizimi joriy etiladi
Sog‘liqni saqlash vazirligi Moliya vazirligi bilan birgalikda 2021-yil 1-noyabrga qadar axborot texnologiyalarini qo‘llagan holda bepul tibbiy yordam olish huquqini beruvchi order berish tizimini joriy etadi. Bunda ehtiyojmand oilalar “Ijtimoiy himoya yagona reyestri” axborot tizimiga muvofiq aniqlanadi.
Imtiyozli toifadagi shaxslar uchun Davlat budjeti mablag‘lari hisobidan davolanadigan kasalliklar ro‘yxati, tibbiy xizmatlar hajmi va tibbiyot muassasasining darajalarini Sog‘liqni saqlash vazirligi tomonidan Moliya vazirligi bilan kelishilgan holda belgilanadi.
Respublika ixtisoslashtirilgan tibbiyot markazlarida bepul davolanishga orderlar berish uchun hududlarni ijtimoiy-iqtisodiy rivojlantirish tadbirlari uchun budjet parametrlarida nazarda tutilgan mablag‘lar hisobidan 2021-yilda Sog‘liqni saqlash vazirligiga qo‘shimcha 80 milliard so‘m mablag‘ ajratiladi.
Iqtidorli va malakali tibbiyot mutaxassislarini qo‘llab-quvvatlash jamg‘armasi tashkil etiladi
Sog‘liqni saqlash vazirligida Iqtidorli va malakali tibbiyot mutaxassislarini qo‘llab-quvvatlash hamda tibbiyot muassasalariga jalb qilish jamg‘armasi tashkil etiladi. U davlat budjeti, SSVning budjetdan tashqari mablag‘lari va boshqa manbalar hisobiga moliyalashtiriladi. Jamg‘arma mablag‘lari hududiy tibbiyot muassasalariga xorijdan ishga jalb qilinadigan malakali mutaxassislar, shuningdek, O‘zbekistonda faoliyat yuritayotgan iqtidorli mutaxassislarga zarur shart-sharoitlar yaratish, shu jumladan, ularni moddiy rag‘batlantirish to‘lovlarini amalga oshirish bilan bog‘liq xarajatlarni amalga oshirish uchun yo‘naltiriladi.
Izoh (0)