Botir Saidov Xorazm viloyati hokimining turizm, sport, madaniyat, madaniy meros va ommaviy kommunikatsiyalar masalalari bo‘yicha o‘rinbosari — Turizm va sport bosh boshqarmasi boshlig‘i etib tayinlandi. Bu haqda Xorazm viloyati hokimligi matbuot xizmati xabar berdi.
Tayinlovga qadar u 2020-yil 17-dekabrdan buyon viloyat hokimining turizm va sportni rivojlantirish masalalari bo‘yicha o‘rinbosari vazifasida ishlab kelayotgan edi.
Botir Saidov 1997-yilda Urganch davlat universiteti, 2006-yilda Prezident huzuridagi Davlat va jamiyat qurilishi akademiyasini tamomlagan.
U 2001—2020-yillar mobaynida Markaziy bank iqtisodiy tahlil departamenti iqtisodchisi, aksiyadorlik tijorat “Xalq banki”ning filiallarida boshqaruvchi o‘rinbosari, boshqaruvchi birinchi o‘rinbosari, boshqaruvchi, aksiyadorlik tijorat “Xalq banki”ning Risk menejment departamenti direktori o‘rinbosari, “O‘ztransgaz” AJ boshqaruv raisi maslahatchisi, aksiyadorlik tijorat “Xalq banki” hududiy filiallar faoliyatini muvofiqlashtirish kompleksi hududiy menejeri, “Xalq banki” boshqaruv raisi maslahatchisi, “Xalq banki” aktivlar monitoringi va muammoli aktivlar bilan ishlash kompleksi rahbari lavozimlarida faoliyat yuritgan.
Avvalroq Xorazm viloyatining Urganch shahri hokimiga ikki yangi o‘rinbosar tayinlangani haqida xabar berilgan edi. Hokimning sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari lavozimiga Nodirbek Babajonov, hokimining yana bir o‘rinbosari — mahalla va oilani qo‘llab-quvvatlash bo‘limi boshlig‘i lavozimiga Qahramon Kenjayev tayinlandi.
Izoh (0)